Qetlîyamê Madimakî ser ro 26 serrî derbaz bîyî. Qetlîyam xeylê cayan de ame şermezarkerdene û kesê qetlîyam de merdbî ameyî vîrardene. FEDA derheqê qetlîyamî de îzehetêk da û dîyar kerdo ke ganî qatilî bêrî mehkemekerdene, neke do qetlîyamê bînî bêrî kerdene.
2ê Temmuza 1993î de Otelê Madimakî yê Sêwazî de şewat amebi vetene û tede şaîr, nuştox, hunermend û sewbîna 33 roşinvîrî ameybî qetilkerdene. Serrgêra qetlîyamî de Federasyonê Elewîyanê Demokratîkan (FEDA) zî serrgêra elewîyan ser o îzehetêk da.
FEDA xeylî qirkerdişê dewleta Tirkî vistî vîrî û vato “Heta ke no fehm hesab nêdo, na birîne do wijdanê Elewîyan de bimano. Heta ke mesuldarî hesab nêdê, do Elewîyî bihuzûr nêbê. Qetîyen ganî hesabê nê qirkerdişî bêro persayene. Seke qirkerdişê Gurgumî înan waşt ke Sêwaz zî bikerê erdêkê sentezê Tirk/Îslamî û tektîpbîyayîşî ser o ferz bikerê. Nika çeteyê DAÎŞî yê ke welatanê bînan ra ardê, wazenê înan ûca bica bikerê.”
FEDA dewamê îzehetê xo de wina vato: “Madimak hewna zî birînêka serê zerrîya ma ya. Înanê ke no sûcê merdimîye kerdo, hesab nêdanê şarê ma û benê wezîr yan zî parlementer. Ganî mulkê ke ameyê destsernayene, bêrê tenzîmkerdene û kiştoxî zî çarçewaya Huqûqê Heqanê Merdiman ê Mîyanneteweyîyî de bêrê muhakemekerdene. Eke wina nêbo 2ê Temmuze 1993 do tarîxê merdimîye de sey deqêko sîya bimano û do qirkerdişê bînî bêrê kerdene. Ê sey Gazî, Gezî, Pirsûs, Roboskî, Şengal û Mabeta. Ma reyna qurbananê qirkerdişê Madimakî bi hurmet bi vîr anê.”
Meletî de qetlîyam ame vîrardene
Şûbeyê Meletî yê Komeleya Kulturî yê Pîr Sultan Abdalî zî serrgêra 26. ya Qetlîyamê Sêwazî de kesê ke qetlîyam de şehîd bîbî, yad kerdî. Komeleye bi rayîrîyayîşêk vera qetlîyam de reaksîyon nîşan da û rayraşîyayîşî ra dima îzehet ame dayene. Îzehet de ame vatene ke îqtîdar ewro vera Elewîyan û heme demokratan de polîtîkayanê tehdît û tedayan domneno û wina dewam kerd: “Qetlîyamê 2ê Temmuze tena vera elewîyan de nê, vera heme bindest û demokratan de ame viraştene. Coka gerek herkes vera zulmî de bibo yew û têkoşîn bido. Bêrê ma pîya vera faşîzm, nîjadperestî û kehenperestîye de bivinderî. Ma qetlîyam xo vîra nêkerdo û ma do nêkerî zî. Şewqê Sêwazî do nêmiro û Madimak do bibo Muzeya Şermî.”
AMED