Zîndanan de hêriş û îxlalê heqan bêmabên dewam kenî. Sewqê hepsîyê nêweşan 3 hewte yo ke domîyeno û wexto ke hepsîyî sewqê nêweşxaneyan benî, hetê heyet û leşkeranê zîndanan ra yenê derbkerdiş. Hepsîyê nêweşî seba ke rewşa înan bêro zanayîş mektubî erşawitî û mektubê xo de bale antî zêdebîyayîşê hêrişan ser.
Herişî hîna zêde benî
Zîndanê Tîpa Tyî yê Bandirma ra hepsîyo bi nameyê Azîz Alpî mektuba xo de wina nuşto: “Wexto ke ez û embazê xo yê bi nameyê Nîhat Malgaz û Delîl Ufakî 12ê nîsane de sewqê mehkema bîyî, raştê hêriş û muameleyê nêbaşan ameyî. Destê ma pey ra ameyî girêdayîş. Leşkerî qet ma goşdarî nêkerdî û hêrişê ma kerdî. Leşkeran qirika ma şidênayî û paskil û lekmatan ma ser de ameyî. Mehkema ra dima zîndan de kincanê ma bi zorî ma ra vetî û ma eştî odeyan. Herişî her ke şono hîna zêde benî.”
'Hêrîşê ma kenî'
Zîndanê Yenîşehîrî yê Bursa ra Fîlîz Gencere zî mektûba xo de wina nuşta: “Ma nêeşkenî kitaban bigîrî. Kitaban qedexe kerdî. Veng bidenê vengê ma.” Zîndanê Tîpa Tyî yê Xarpêtî ra Dilşad Şengule zî mektuba xo de wina nuşta: “Kesê ke doza FETOyî ra ameyî tepiştiş, dîyayî koguşê kişta hepsîyê cinîyan û bi saye, pîyanz û nane hêrişê koguşê ma kenî. Seba provokasyonan marş wanenî û siloganan erzenî. Heyetê zîndanî zî qet vengê xo nêkeno. Eksê ci piştî danî înan. Dermanê bê eleqeyan danî ma. Embaza ma de nêweşîya mîgrenî estbîye, la dermanê serde girewtene dîya aye. Ganî sewqê hepsîyan 3 hewte ra hîna lez bêro kerdiş.”
DÎHABER/AMED