Ala PKKî qeleya 

Tarîxê heme şaranê ke bindestî de cuyayî, ca û şaritanê sembolî estêy. Wexta mêtingerî beno xorî û heme cayanê welatê mêtinger de desthilatdarîya xo dano roniştene. Nîme ra vîşêrî şarê mîyanî de hemeyê şarê waltê mêtinger bin tesîrê serdestan de manenê. Ravêreyeya mêtingerîyê çand derg bibo tesîrê xo zî hintayê xorî kena.

Şarê ke demên derg û dila bin mêtingerî de manenê bi hêdî hêdî heme çandê xo kenê vindî. Sewatê nêy endî nêşenê xo arêdê pêser û serehawanayîş bidê despêkerdiş. Çimkî yew komelek belî heqîqatê xo ra dûrî kewto se, endi rew bi rewe nêşena ageyro raşteya xo. Goreya eyî endi yew manayo kamî çan û tarîxî nêmenda. Çimkî hetê ra mezgê ci ameyo bedilnayiş hetê ra zî civakbîyişê ci ameyo letekerdişî. Şareke no hawa civakek letebîye mîyan de cuwiyena zî refleksê xo yê rûmetin kenêy vindî. Sewata nêy zî heme kerdişanê zaliman ancenê pîzeyê xo û vengê xo nêvecênî.


’Şar endi tahamulê mêtingeran nêkeno’

Helbet no şîyayişa sîya û tarî heyanî peynîya tarîxî zî ana nêdomîyeno. Zilmê serdestan cayê ra tepa reseno çareyî û mîyanê şarê bindestî de beno semedê cigerayişan. Şar endi tahamulê mêtingeran nêkeno, la balê sewato ke kamî çandê xo ra çewt o ke ameyê tersnayiş rew bi rew nêşenê îtîraz bikerê. Biwazê bikerê zî nêzanêne no gure senî yenokerdiş. Çimkî heme cuyê xo de serdest û mêtingeran ra îteat kerdo û milê xo hemverê înan tadayo.  Biwazo sere hewano zî, do nêzanibo ke no çi senî yenokerdiş.

Hetê ra ters, hetê bînî ra giraneya zilmê zaliman beno pêtek adir û zereyê şarê bindest veşneno. No dej zî beno semedê qeyrayişê rayîra azadîyê. Adir senî hawa hemînan veşnena, la balê bolînanê înan nêwazênê vengê xo bikerê. Heta eşkenê vajê ke “çîyê nêbeno! Înan nêvatênê adir semedê ma biveşo zî, ma ciwiyenîme” tenya ciwîyayiş înan rê qîm keno: “Wa cuyê ma bidomîyo senî domyeno wa hina bo û vanê: “no mergo kewte indî beno felsefeya cuyê înan. La balê humarê ci tayin bo zî ê ke no şîyayişî qebûl nêkenîy zî şarî mîyanî ra vejîyenê. Tarîx merdimanê ana zerrepola ra vana ‘şorişger’.

Şorişgerêy ge bi yew kesî ge bi panç kesan, ge bi davîst kesan dest pê keno. Her tim bi werdê merdimîy vejîyayî. No rayîran û wextî mîyan de peyder pey hemeyê şaran genê mîyanê xo. Şoreş gird bi û hemeyê şarî werezna lingan ser o pîya şaristanêke şoreşî, oca ra dest pêkerdê. Ravêreyeya tarîxî de bi xo benêy tarîx. Çimkî wextê ke heme şar tersayê û ravêreyeya tarîxî û bixo beno tarîx. Çimkî wextê ke heme şar tersayê û hemberî zilmî milê xo tadayê de ê hemverê serdestan vindertî. No vinderdişê înan heme şarîy ra beno fînak û gan dano civatî.

Helbet dişmen zî tewr vêşî şarê ê cayar ser o vindeno û pêkutîyê xo yo tewr girdî înan ser o ra ramneno. Nêy zî bedelê tewr girdî şaristanê ke verê heme kesan wariştî lingan ser, benî cayê sembolî.


’Sêwreg sewata ma cayeke sembol o’

Tarîxa tevgera ma de cayê inasarên bolîyê. Sey fînak merdim eşkeno dewa Fîsî ê Lîceya Amedî vajo. Reyna cayê Hîlwan û Sêwregî tarîxê ma de cîya yê. Dihî û Şemzînan yew sembolo bîn, zwb. estêy. Dewa Fîsî de partî ameya ronayene. Sewata nêy sembol o. Sêwregî de ronîyayişê partîyê ameyo îlankerdiş. Çalakîyê PKKî yê tewr sifte ameyokerdiş. Na riwal ra Sêwreg sewata ma cayeke sembol o. Dihê û Şemzînan de zî sey yeno zaneyene lejê gerîlatey ameyo destpêkerdiş. 

Nêy şaristanî û şarçeyanê Kurdistanî sembola ma yê xoverdayişî yê. Rayver Apo kuçe bi kuçe û papûranê nêy cayan de faalîyet kerdo. Heme şehîdê ma rayverê Kurdistanî yê ke nêy cayan de şer dayê destpêkerdiş. Sewata nêy zî ganî ê cayê sembolî destê ma de bî. Licê, Dihê û Şemzînan de ala PKKî daliqnaye yo. La belê ma hewna nêşkîyayo ala xo qeleya Sêwregî ser o zî bidaliqnîme! No 30 serr bî zilmê çetayanê Bucaxijan (Keyê Hecîyan) Sewregî de serdestêy. Ma vatê qey weçînayişê 30 adare 2014’î de ma do Sêwregî bigirîme la nêbi! Nêgirotişê şaredarîya Sêwregî yew şermeke gird o. Ganî ma bi rihê Cuma Takan, rihê Kemal Pîran û Mehmet Karasûngûran, rihê Sûzan Îzol, Yilmaz Uzun û Remzî Avciyar şa bikerdêyime.


Sifte çarşîyê Sêwregî de ame îlankerdiş

Sêwreg şaristaneke kozmopolîtîk o. Duştê ci yê welatparêzeyî zî berz o. La balê dişmen cuntayê 12’ê Îlonî dima ra welatparêzêy Sêwregî ser de texrîbateke gird avera berdo. Tayin taqtîqanê çewt ê partî zî bîyê semedê texrîbatan. La balê indî wextê Sêwregî zî ameyo. Roja ma yo ewro de tesîrê PKKî sîndorê Kurdistanî ravêrnayo. Tayin mendo heme Rojhilato Mîyanên bibo Apoger! Di demserr û ravêreyeyek ana de eke ala sûre yê PKKî qeleya Sêwregî ser o nêro daliqnayene se, no do bibo dejeke hemeyê welatparêzanê Sêwregî… 

Ma xo vîra mekerîme ke nameyê PKKî tewr sifte çarşîyê Sêwregî de ame îlankerdiş û diruşmeya “Bicûyê PKK” tewr sifte “Kuçeya Şeytanî” ya Sêwregî de ame çekerdene. Yanê Sêwreg tam bolê doz û lejê ma yo. 

Goreya ma indî wextê Sêwregî zî ameyo…



KENAN AVCI / Zîndana Tipa F ya Humara 2’in a Tekîrdagê