Kongreyê Cimatê Demokratîke (KCD) derheqê serrgêra îdambîyayîşê Şêx Seîd û embazanê ci de îzehetêko nuştekî da û şehîdan vîr ard. KCDyî îzehet de dayo zanayene ke 29ê Hezîrane vîrê Kurdan de wayîrê cayêko muhîm o.
KCDyî îzehet de vato ‘29ê Hezîrana 1925î roja de hewl dîya waştişê xoserîye yê Kurdan bêro tasfîyekerdene û wina domnayo: “No tarîx vîrê Kurdan de serewedaritişêko rûmetin o û wina zî cayê xo girewto. Rayberanê Kurdan ra Şêx Seîd û embazê ci hetê Mehkemeyanê Îstîklalî ra ameyî îdamkerdene û şehîd bîyî.”
KCDyî îzehetê xo de vato ‘Şêx Seîd û embazê ci sey vizêrî ewro zî zîhnîyetê Kurdan roşin kenî’ û wina dewam kerdo: “Nê şehîdî tena hetê Kurdan de nê, hetê heme merdimîye de sey serkêşê azadîye, seyyewbînanî û edaletî cayê xo girewtî. Dozger û hakimê mehkemeyê Îstîklalî ke Şêx Seîd û embazanê ci îdam kerdî, wijdanê Kurd û merdimîye de mehkûm bîyî. Ewro mîraso ke hetê Şêx Seîd û embazanê ci ra ame verdayene, hetê torinanê înan ra Vakur, Başûr, Rojawan û Rojhelat de yenî girdkerdene û pawitene. Nika serrgêra 94. ya şehadetê înan de xebatê Yewîya Neteweyî dewam kenî û wext wextê no het de serkewtişî yo. Ma yewna rey Şêx Seîd û embazanê ci bi rêzdarî vîr anî û ma dîyar kenî ke ma do têkoşînê înan biresnî serkewtişî.”
AMED