Ma yew komek rojnameger çend rojî yo  Kurdîstanê Başur de gêrenê. Çetê DAÎŞ çi ardo serê Kurdanê Ezîdî, ma înan takîq kenî. Kurdanê Ezîdî zulmek seyî diyo, seyî ameyê qirkerdîş, ma yew bi yew musenî. Ma Şêxan ra heta  Baedre, Baedre ra heta Dîhok, Dîhok ra heta Peşxabur, Peşxabur ra heta Keşanê Heftanîn şî.

Ma no gêrayîş de çi dî û çi nedî. Ser rayîran ra heta parkan, banê veng ra heta bînê daran Kurdê Ezîdî vila bîye. Pêronê rayîran de zerrê wesayîtan de Kurdê Ezîdî asenê û barkenî.Teber de hema hema pêronê cayan de eynî manzera esta.  Yew felaket a. Yew gît a. Wexto ke yew şîno Geliyê Keşanê yê Heftanîn manzeraya ke esta însanî xemdar kena. Tut, cenî, laj, keyna, dayî û bawî bi hezaran Kurdê Ezîdî ameyê pêser. Hema remenê û remenê. Keşan ra şînî Roboskî, ucara zî şînî Şirnex, Mêrdîn, Riha, Amed û Batman. Vanî, “Cayê ke Erebî ciwiyenî, ma nêwazenê uca de vinderê. DAÎŞ serê xo biquvet nîyo.  Erebê cîran destek danî DAÎŞ. Xo ra aye ke keyê ma şalenê û talan kenî, keyna û ceniyanê ma remnenê, ma kişenî û qirkenî, giranî înan Erebê cîranî yê. Î ke nêbiyenê DAÎŞ nêşîkiyenê  bikewo Şengal û qetlîam bikero.”
Hîna qisekenî û ax ancenê. Kam hew Kurdê Ezîdî fekê xo akeno, eynî qise keno.
Tayî vanî ma tepiya anêgêrenê. Cenî vanî ma wazenî agêrê. Reyna vanî eger Şengal bi temamî biyero rizgarkerdîş, ma agêrenê Şengal. Çimanê înan de ters û xemdariye asenê.  Pêronê înan biye sey însanê rebenî. Xo ra Kurdê Ezîdî reben yê. La reyna qalê gerîllayenê PKK û YPG kenî. Vanî,”İnan ma xelas kerdî. Tena bawerîya ma PKK rê esta. Zobî ma kesek rê bawer nêkenê. Xo ra peşmergê PDK, Şengal verada û remayî. Gere mesulê peşmergeyanê PDK, Serbest Babir u Saîd Kisteyî ra hesab biyero perskerdîş”. La pêronê Kurdan ra yardimê manevî û maddî wazenê. Mal û milkê înan hetê çeteyanê DAÎŞ ra ameyo talan kerdîş. Pere, zern û pêronê çiyê înan yê erjayî çeteyanê DAÎŞ berdê. Rut mendî, zulît mendî. Letek nanê înan zî çîno. Çi cil ser înan de esto, sermayê înan tena o yo. Kurdê Ezîdî, ayê ke derbazê bakurê Kurdîstanî biyê, gere Şarê Kurdî yê bakurê Kurdîstan na raştî bivîno û gorê naye hetkarî bikero. Tena bajare Amed eşkeno, pêronê Kurde Ezîdî weyî bikero. Şarê Kurd ke no wezîfê xo nêkero, seyî beno însan! Seyî beno Kurd!