Dêrsim de bi rayveriya Şaredareya sûk û Federasyonê Elewiyan, vîrardene Mezelxaneyê Şehîdan yê Bese û Dr. Baran de virajiya. Parlamenterê HDP yê Dersîm Alîcan Onlu kî malbatanê şehîdan ra piya tewrê vîrardene bî.
Rez guretene ra dima Hasan Genç qeseykerd û nîya va: “‘Ewro tarixê Tirkiya de rozê da tarî ya. Serva iyê ke bê kefen ginê hardî rê şa giredame. 78 serrî verde ra hama hona zîhniyetê qetil kerdox nêvûriyo, hona terteleyî dewam kenê. Na zîhniyeta faşîst ewro kî koyan, mezeleyan, cayanê îtiqatî bombe kena. Ma reyna dî ke, namê hikumatan vûrîno, hama zîhniyetê ci nêvûrîno.’’
Pîr Hayrî Şahîn kî merasîm de qisey kerd û hayr ont serestisanê pêyenan yê dewlete ser: ‘’Yezîd emserr Dersîm de, Amed de, Pîrsûs de, Anqara de bî. Ma ra honde tersenê ke, mezelanê ma ra, asteyanê ma ra tersene. Merasîm de zonayis ame dayen ke, Mezelxaneyê Şehîdan yê Bese û Dr. Baran ke hetê arteşa Tirk ra ameyî bî riznayene, hetê Federasyon û Komelanê Elewiyan ra newe ra do bêro înşa kerdene.
Xarpet de kî vîrardene Sey Riza û alwozê ci, Meydanê Genîm de viraziya. Şêlîg Garajê Xozat ra heta Meydanê Genîm şiyayis viraste. Na ca de hemserokê HDP yê Xarpêt Yunus Guneş qesey kerd û hayr ont tarixê Tirkiya ser û vat: heta nika terteleyê ci ramene.
Guneş‘î vist vîrî ke mavên ra 78 serrî vêrdî ra, la hona cayê mezelanê Sey Riza û hevalanê ci eskera nêbiye. Vîzêr Dersîm, Zîlan Qoçgîrî, ewro kî Farqîn, Cizîra Botan, Nisêbîn de verra wastîsanê şar, ebi serestisan, qetlîaman cewab dane. Nayê rind bizone ke iyê ke raya Sey Riza de sonê, tekoşînê dane qeyta vilê xo kî çot nêkene. Sey Riza û hevalê ci, Erzîngan, Îzmîr û Estemol de kî bi çalakiyana ameyî yad kerdene.
DERSIM/XARPET