Bi wesîleya serrgêra 81. ya Qirkerdişê Dêrsimî, xeylê cayan de çalakîyî vîrardişî ameyî viraştene. Çalakîyan de qirkerdiş ame şermizarkerdene û dewleta tirkî ra ame waştene ke wa têrî bimano. Dêrsim de hêzê Emeg û Demokrasî semedê vîrardişê Seyîd Rizayî û embazanê ci Meydanê Seyîd Rizayî de ameyî têhet.
Hemserekê Peroyî yê HDPyî Sezaî Temellî û Parlamenterê HDPyî Alîcan Onlu, Dilşat Canbaz, Zeynel Ozen Alî Kenanoglu û Keman Bulbulî ya pîya temsîlkarê HDP, DBP, KCD, DAD, PSAKD, ABF, DEDEF, EMEP, SMF, ESP, SKM, PARTîZAN, BARO, DÎSK, KESKû ÎHDyî û xeylê hemwelatijî tewrê ci bîyî. Pîranê Ocaxê Seyît Sabunî ra Mehmet Seyîtalîogluyî mume vistê tê û vat ke nê çila û mume vera zulm û tarîtîye roşnayîye temsîl kenî ez na mume semedê tarîyî bîbî roştî tafînena.
Reyna Stenbol de zî Seyîd Riza û embazê ci ameyî vîrardene. Vîrardene binê varanî ame viraştene û xeylê kesî beşdarê vîrardişî bîyî. Vîrardiş de vera qirkerdişî de reaksîyon ame nawitene. Vîrardiş ra dima lawika ‘Dayê daye’ ameye wendene û loqme ame vilakerdene.
Qirkerdiş hîna zî dewam keno
Heto bîn ra paytextê Almanya Berlînî de zî vernîya konsolosxaneyê tirkî de zî vîrardiş virazîya û xeylê dezgehan destek da vîrarişî. Vîrardiş de ame vatene ke ‘şarê Dêrsimî bi hawayo bêpawitiş û bêsîleh bî û ameyî qirkerdene’. Temsîlkarê dezgehê AvEG-KONî Bakî Selçukî va ‘dewleta tirkî Dêrsim de bi plan û program qirkerdiş viraşt û no qirkerdiş hîna zî dewam keno’.
MERKEZÊ XEBERAN