Rochelato Mîyanên bi heme taybetîyanê xo cayêko cîya yo. Rrayira hakimbîyişê sîyasetê dinya, îtîya ra ravêrena. No sebeb ra zî sîyaseto tewir qilêrin û bazarê tewir bêexlaqîy îtîya de yenê kerdiş. Bi vatişêko bîn Rochelato mîyanên, sifreyê vergan o. Na axe de lingan sero vindertiş sîyaset, zaneyî û meharetêko pîl wazeno.
Referandûmê Birêz Barzanî rê 24 seetan tayêrî wext mendo. Do pêk bêro, nêro yan zî kamco bajaran de û senî pêk bêro, dîyar nîyo. Didi partîyê pîlîy, partî û rayvistinê qican û heremêy cîyayan êy Başûrî ra, vengêy cîya- cîyay vecîyenê.
Azadîya Şarê Kurdîy û Kurdîstanêko azad, xeyalê her kurdêke yo. Kamco perçe, bawerî yan zî fikir ra beno wa bibo,tu kurdêke verva naye nêvecîyeno û nêşikeno vecîyo.
Referandûm ke heqêko tewir meşrû, rewa û xozayî yê heme şaran o, çi ra bîyo mijara nîqaşan û mîyanê şarê kurdî de bîyo sebebê nakokîyan. No qerar senî û bi çi nîyet ameyo girotiş. Sebebê nêy nîqaşan çi yê.
Îtîya de bazarêke est o. Çîyo ke yeno bazarkerdiş hest, hîvî û xeyalê şarê kurdî êy azadîye, êy bi seyan serran ê.Şarê kurdî di no oxir de bedêlêy zaf giranîy dayê.Bazarkerî wazenê ney erjan sero menfîetanê kesanî, malbatî û hîzbîyan bi dest bifînê.
Sebebîy cîya û zaf ê. Nînan ra çend hebîy;
Yew; Heta êrîşê çeyetanê DAÎŞÎ êy verva Şengale, Kobanê û bi temamî verva Şarê Kurdî, di dinya de gama ke behsê kurdan bîyê, Barzanî û rayverîya Hewlêre ameyê vîrî. Bado ke Meclîsa Hewlêre amî padayiş û Hewlêr ro serokê meclîse ame qedexekerdiş, bado ke di êrîşê çeteyan yê verva Şengale de Kurdêy Êzîdî însafê çeteyan de amey verdayiş û temaşeyê qetlîamî ame kerdiş, bado ke Vakûrê sûrîya de sîyasetê Erdoganî ame rayirberdiş û verva şoreşa Vakûrê Sûrîya neyartî amî kerdiş û polîtîkaya ambargo ya Erdoganî amî rayirberdiş, hem raya pêroyî ya kurdan û hem zî dinya de, Barzanî çim ra kewt.
Didi; Hewlêr û rayverîya ey 20 serre zêdêrî yo ke, zê dewletêke tê geyrenê û heme dewlemandîyanê Kurdistanê Başûrî bi goreyê zerrîya xo bi kar anê. Labelê nê di wareyê civatêkê demokratîkî, nê aborî nê perwerde û nê zî pêkardişê sîyasetêkê kurdistanî de, averkewtişêke pêk nîyard. Nameyê rayverîya Hewlêre bi dizdî, rişwet, verva muxalefet û civatê sivîlê kerdeneyê antîdemokratîkî û bêrayîyê aborî, ame binamekerdiş.
Hîrê; Didi serrîy o ke Birêz Barzanî bê weçînayiş û bi awayêko antîdemokratik serokatîye keno û nêşino weçînayişan. Parlamento nêdano xebetnayiş û no qerar zî bê parlamento girot o, zaneno ke seba sîyasetê xo yo ke heta nika pêk ardo ra do weçînayişan de bi ser nêkewo.
Çar; Bi xoverdêrîya Kobanê û xelesnayişê Şarê Şengale qetlîamê DAÎŞÎ ra sîyaset, proje û averkewtişê civatî yê Hereketê Azadîye û kurdanê Sûrîya ke ro ser Paradîgmaya Rayver Ocalnî pêk amey, kewtîy rojdema dinya. Êdî kurdîy bi gêrîlayanê HPG, YPG û YBŞ yenê nasnayiş.
Gama ke merdim awneno nêy sebeban ra merdim vîneno ke, fikir û nîyet û qerarê viraştişê ney referandûmî di destpêke de têkşîye û bêke menfîetê netewî êy Şarê Kurdîy bêrê fikirîyayiş, ameyo girotiş. Birêz Barzanî rê hewldanêka sansasyonele ke reyna ey bifîo çiman, hewce kerdê. Seba naye Birêz Barzanî, hewn, xeyal û hestêy Şarê Kurdî êy seserran êy azadîye, bi kar ardîy. Sîyasetê Erdoganî.
Çalakîyê civatî bi paştîdayişê civatî bi ser kewenê. Bê şewr ê yewîtîya şaran, serkewtiş nêbeno. Êdî no referandûm pêk bêro zî do bi awayêko sembolîk bo û do tu menfîetê ey Şarê Kurdî rê çîna bo. Gere hest, hewn û xeyalê xeyalê Şarê Kurdî nêbibêne amûrê bazarî êy berjewendîyê takekesî, malbatî û hîzbîyan.