Hemserokê HDP Demîrtaş ke tewrê mitîngî bi aşkere kerd ke Rojhelata Mîyanî de kişîyayişê girdî dê bibê û va, ma mecbûrê ke zilmî sera sera şirê. Zewbîn tercîxeke bîn çinyo. Des hezaran kesê ke tewrê mitîngê Amedî bî de dûştê qetlîam û derbe nêrazîbîyenê gird damûsnîya.
Mitîngo ke bi ‘Çerxa Şoreşê’ destpa kerd bi mesajanê temsîlkaranê sîyasî dewam kerd.
Yardimkarê Hemserokanê DBP Demîr Çelîk’î vist vîrî ke şarê kurd 40 serrîyo pêrokîn manîkerdişan bi xoverdayişê xo ravêrna û hayr ant berzkerdişê tekoşîn ser. Qiseykerdoxa HDK Gulîstan Koçyîgît zî ard ziwan ke HDP, HDK û DBP hetê şaro ke bedel da amey ronayen. Koçyîgît hayr ant wedarnayişê heqê destnêdayişê parlamenteranê HDP ser û va ‘o meclîs yê pîyê şima nîyo, emegê cenîyan, bindestan û şaran o. Koçyîgît peynîyê qiseyanê xo de va quwetê şaro ke xover dano do zilmî biqedîno.
Dîktatorî lejî ferz kenê
Hemserokê KCD Hatîp Dîcle zî hayr ant Aşma Remezanî ser û vist vîrî ke dîktatorê ke îslamîyetî fekê xo ra veranêdanê herbî ferz kenê. Dîcle va no welatî de dîktatorî gonî rijnenê û aşkere kerd ke îye dê parlamenteranê xo tenya nêverdê, xover bidê û serkewê.
Hemserokê HDP Selahattîn Demîrtaş ke tewrê mitîng bi derheqê êrişanê hikûmeta AKP û Erdogan’î de mesajê muhîm day. Demîrtaş’î vist vîrî ke kurdan bi bedelê gird û giranî cepheyê sîyaseta demokratîk akerdî û aşkere kerd ke serkewtişê weçîntayişan bi rayverîna mayan û fedekarîya gencan bi.
Heyf ê gencan o
Hemserokê HDP da zonayen ke serva ke HDP bin bendawê weçîntayişî de bimano çi destê ci ra ame ey kerdî û va, goreyê hesabê Seray gerek HDP bin dêsê weçînayişî de bimendiba.
Hemserokê HDP Selahattîn Demîrtaş’î aşkere kerd ke vinderdiş û xoverdayişê înan do her tim serva haştî bo û qiseyê xo wina domna: “Dawaya ma ya haştî dawaya ke çormeyê Seray de bîat kena nîya. Serva ameyişê roşn tek tercîx ma yê. Înan de zûrî, tiriten û bêrêtî zaf ê. Bin dîktatorî de serokîn ra vêşêr teba qisey nîkenê. Nê êşkenê makeqanûna azadîwaşt virazê? Yê ke bîyê wezîr eke jû TL bivînê ef nêkenê, tirenê. Hesabanê şima yê taybet de bi mîlyon dolarî estê. Gencanê no welatî rê heyf o. Dewlet heta hucreyê qijkek girotê destê xo. Dewlet yê herkesî ya, la eke ti dewlet açarnê mal û milkê herkesî kes na dewlet rê hurmet nêdano.”
‘Partîya ma mal û ariqê şarî ya
Demîrtaş’î aşkere kerd ke ê serva menfeatanê xo nê, serva sîyaseta demokratîk û xîzmetê şarî destpa sîyaset kerdî. Hemserokê HDP aşkere kerd ke kêmî û şaşîyê înan estê û serva rexnekerdişî kêberê xo şarî rê akerdî û vist vîrî ke HDP mal û ariqê şarî yo.
Selahattîn Demîştaş’î da zonayen ke aqilo ke Enqere de yo aqil ra vejyeyo û qiseyê xo bi nê vatenan domna: “Ma heta qirika xo awzkêmkî de xewirîyê. Dinya de qe jew dostê Tirkîye mend o? Nezdî de Rojhelata Mîyanî de kişîyayişê cidî dê bibê. Şarî hinî bin hikmê statukoyî de nêcuwyayişî misyayî. Bi şarê bîn dişmen vînayiş ra kes nêreseno hizûrî. Serva ke netewperwerîya tirk quwetir bikerê dişmenîya kurdan hedef damojnenê. Bê HDP omid o ke welatî bixelesno çinyo.”
Demîrtaş’î peynî de veng da şarê Amed û wina va: “Wa pêrokîn şarê Amed nay bizano ke jew deynê ma yê mitîngeke bi heybet esto. Ma mecbûrê ke zilmî sera sera şirê. Zewbîn tercîxeke bîn çinyo. Zey şarê Amed ma dest bidê pê bi quwet bê û rayşirê.Badê qiseyan şêlig bi sloganan vila bî.
DÎHA/AMED