Badê ke Rayberê Şarê Kurdî Abdullah Ocalanî avûkatan reyde pêvînayîş viraşt, çalakîyê grevê vêşanîye û rojeyê mergî qedîyayî. Dayîkanê Aştîye serkewtişê çalakwanan pîroz kerd û wina va: “Silamê Ocalanî zerrîya ma de hêvîya ma kerd pîl. No hîna destpêk o û ma do xoverdayîşê xo gird bikerî.”

Tecrîdo ke ser Rayberê Şarê Kurdî Abdullah Ocalanî de yeno domnayene, dewam keno. Hemsereka KCDyî Leyla Guvene, bi hezaran hepsî, xeylê sîyasetmedar û Dayîkanê Aştîyan seba ke tecrîdê serê Ocalanî bêro wedarnayene, nizdîyê 7 aşmî têkoşînêk da û netîceyê têkoşînî de avûkatan şêna Ocalanî reyde pêvînayîşan bikerî.

Pêvînayîşan de Ocalanî mektûbêk erşawite û çalakwananê grevê vêşanîye û rojeyê mergî ra waşt ke çalakîya înan resaya amancê xo, cok ra wa çalakîya xo biqedêne. Çalakwanan mektûba Ocalanî ra dima çalakîya xo qedênaye. Çalakwanî neqlê nêweşxaneyan bîyî.

Babete ser o endamê Meclîsê Wanî yê Dayîkê Aştîye qisey kerdî. Dayîkan ra Zekîye Kayaye daye zanayene netîceyê xoverdayîşê zîndanan de serkewtiş ame qezençkerdene û wina dewam kerde: “Bi aşman o serkêşîya Leyla Guvene de xoverdayîşêk dewam kerdêne. No xoverdayîş resa amancê xo. No serkewtiş saya Zulkuf Gezen û Ayten Beçetan de ame qezençkerdene. Nê xoverdayîşê îradeya kurdan nîşanê heme dinya dayo. Ma dayîkî do seba aştîye hertim ziqaqan de bibî.”

Xoverdayîş dewam keno

Dayîke Hanîfe Koçaka ke lajê aye 86 rojî grev de mend, va ‘domanan mizgînîye daye ma’ û wina domnaye: “Ma qet fek xoverdayîşî ra veranêdayo. No serkewtiş saya domananê ma de ameyo. Heta ke toximê aştîye keske nêbî, ma do têkoşîn bidî. Wa bicuye xoverdayîşê zîndanan.”

Dayîke Xane Akdage zî bale ante silamê Ocalanî ser û wina va. “Silamê Ocalanî zerrîya ma de aştîye pîl kerd û hêvî ronaye. Nizdîyê 7 aşmî bi ke domanê ma zîndanan de xover dayênê. Saya înan de no têkoşîn resa serkewtişî. Ma dayîkî heta peynî xoverdayîşê xo bidomnî û fek têkoşînî ra veranêdî.”

Ma bi domananê xo serkewtî

Dayîkan ra Bese Akdogane zî serkewtişê xoverdayîşî pîroz kerd û wina va: “Ma roja sifteyîne va ‘ma do domananê xo reyde serbikewî’ û ma serkewtî. Ma dayîkê kurdan, ma qet fek xoverdayîşî ra veranêdayo. Ma do qet vera zulmî de bêveng nêmanî. No hîna destpêk o û ma do xoverdayîşê xo gird bikerî.”

Nê mesajî tarîtîye roşin kerde

Dayîke Kewe Işike qala domnayîşê têkoşînî kerde û wina va: “Ma Dayîkê Aştîye, têkoşînê xo bidomnî. Bawerîya ma bi domananê ma estbî. Ma heta ewro ziqaqan nêterikna. Çimkî xoverdayîşêko tarîxî estbi û ganî ma bêveng nêmendêne. Çîyê ke kewtêne milê ma ser o bi ke ma nê vengî bidî eşnawitene. Doman û dayîkî pîya qezenç kerdî. Nê mesajî tarîtîye roşin kerde.”

Dayîke Hedîye Koçake zî hîsê xo ardî ziwan û wina va: “Peynîya xoverdayîşî de serkewtiş ame qezençkerdene. Ma biqerar û hêvîdar bî. Ma hêvîya xo kerde pîl û qezenç kerd.”

 

JINNEWS / WAN