Hen oseno ke kurdî qeyta jû nêbenê. Başurê Kurdîstanî de 22 serrî yo hebe serbestiye esta. Sayîya NATO de kurdê başurî biyê wayîrê vizoyê herdî. Îmkanê başûrî seweta serbestiye û welatedê xoserî 1992 de ameyî dayene. Hama quwetanê siyasî yê başurî qedir û qiymetê nî îmkanan nêzona. Hata na roze teyna heremêke NATO seveknayî û binê hukmê partiyanê başur de bî, destê kurdan derê. Jû Kurdîstan înşa nêbiyo. Xêle heremê Başurî hona giredayê Iraq yê. Nî hereman de zî kurdî hetê DAÎŞ ra yenê qetil kerdene. Na derheq de quwetanê siyasî yê başur ra vengê nêvejîno. Qeyta gurenayîsê xo yê guretena nî hereman kî çîno. Sawoke nî heremî herdê Kurdîstanî niyê.

Başur de herkes hukumatê xo yo. 2 hukumatî estê, jû yê YNK, jû kî PDK yo. Yanî başur de jûyena kurdan çîna. Eke destebera xo bêro jûvînî xeneknenê. Başur de herkes peran sero qesey keno, qisaweta xo yê welatî çîna. Partiye siyasiyê quwetinî mavênê xo de perêke petrol ra yenê, kenê bare, zovîna tewa bîrûbazarê înan de niyo. Bakur, rojava û rojhilat rê kî yardim nêkenê.
Nika mordem hebena zelal vîneno ke partiyê Başurî jûyena kurdan nêwazenê, verva na jûyenî vejînê. PDK Rojava rê yardim nêkena, dismenanê kurdan jê DAÎŞ rê bi kinitena xendekan yardim kena. Nî xendekî seweta xelesnayena Kerkuk û Xaneqîn nênê kinitene, seweta xenekitena serbestiya rojavayê Kurdîstanî yenê kinitene. Ma zoneme ke demê Enfal de başurê Kurdîstanî de 183hezar însanê ma amê qetil kerdene. Bi taybetiye PDK gune nî biyayîsan verê çimî de bijero. Dismenê kurdan başur, bakur, rojava û rojhilat ceranêkenê. Hedefê dismenanê kurdan çik yê, ma nî rozanê peyenan de Xaneqîn û Seediye de dî.
Ebi Tirkiye ra biyê jû, piya xendekan kinenê. PDK hetê xora, AKP hetê xora. Tabî partiyê Başurî yê bîn kî honde vengê xo nêvezenê. Gorê nînan, PDK teyna qerar do û xenedekan kinena. Na vatîs tam rast niyo. Ma vîneme ke partiyê bînî vengê xo jede berz nêkenê. Çike nî partî kî binêdest mendena kurdan ra bara xo cenê. Hukumatê Iraqî cirê peran rusneno, nî kî wertê xo de kenê bare, piya wenê. Birêz Barzanî gune vatîsê xo yê serra 2005 biyaro xo vîrî. O waxt vat bî, mavênê kurdan de naye ra tepiya endî “Birakujî” nêbeno. Hama rojava de kurdî yenê qirkerdene, PDK kî hetê ra xendekan kinena, çeverê Sêmalka gureto, birayanê xorê yardim nêkena. No yeno çi mane?
Dismenê kurdan her tim vanê: En kurdo rind kurdo merde yo. Kamij het de beno bibo. Û ma de jû qese esto vanê: Kamke kineno roze ebi xo gineno piro!