Mehkemeya Edlîye ya Herêma Dîlokî qerarê mehkemeya herême ya ke bi îdîaya ‘endamê rêxistine bîyayene’ ra 2 serrî û nîme ceza daybî Parlamentera HDPyî ya Sêrtî Besîme Konca, munasîb dîybî û tesdîq kerdbî. Na çarçewa de fezlekeya ke derheqê Verfeka Meclîsê Cinîyan Besîme Koncaye de ameybî amadekerdiş, 2 rojî verê Meclîs de ameye wendiş û bi no hawa parlamenterîya Koncaye kewte. 

Babete ser o Parlamentera HDPyî ya Edene Meral Daniş Beştaşe qisey kerde û vera nêyî de reaksîyon nîşan daye. Beştaşe va ‘betalbîyayîşê parlamenterîya Koncaye dewamê operasyonê ke vera HDPyî de yenî kerdiş î’ û qiseykerdişê xo wina domnaye: “Heta nika Besîme zî tede parlamenterîya 5 embazanê ma ameye betalkerdiş. Meclîsî yewna rey îradeya şarî pelçiqna û yewna rey piştîya xo da şarî. Her ke şono Meclîs temsîlîyetê xo yê şarî vînî keno û temsîlîyetê şarî orte ra wedarîyeno. Ma nînan şermizar kenî û qebul nêkenî. Besîme Konca parlamentera şarî ya. Wa şêrî sêrtijan ra bipersî. Ê nêşenî cayê xo de ronîşî û parlamenterîya îradeya şarî betal bikerî.”


Birêz Ocalanî vindarna

Heto bîn ra Beştaşe derheqê serrgêra hedîseyê 6 û 8ê Teşrîna verêne de zî va ‘seke yeno zanayîş o wext çimê heme dinya Kobanê de bî’ û wina dewam kerde: “Hedefê herkesî o bî ke hêriş û qetlîyamanê DAIŞî asteng bikerî. Kobanê de kurdan vera DAIŞî de xover dayêne. Vatişê Serekkomar Erdoganî yê ‘Kobanê ha kewte û ha keweno’ rayapêroyî de hêrsêko gird awan kerd. No vatiş û nizdîbîyayîşê hukmatî bî sebeb ke şar vejîyo rasteyan. Nê hedîseyan ver 50î ra zêdeyêr kesî merdî û bêxera Yasîn Boru ne tehqîqatêkî esto û ne zî şopnayîş’ û wina va: “O wext Îmrali ra xebere ameye û ame dîyayîş ke hukmat şîyo Îmrali. Hukmatî Birêz Ocalanî ra waşto ke wa hedîseyan bivindarno. Nê pêvînayîşî heme qeydkerde yî. O wext heyeto ke mîyanê ci Demîrtaş zî estbî îzehetêkî da. Ganî merdim bido vîra hukmatî; yê ke hedîseyan da vindarnayîş Birêz Ocalan o. 

Beno ke mergî zêde bibîyêne

Beştaşe va ‘eke o wext hedîseyî nêvindetênê, mergî do zêde bibîyênê’ û wina dewam kerde: “Eke dewam bikerdêne, beno ke telafîyê ci nêbîyêne. Merdim nêşeno çîyêk vajo, labelê o wext HDP, KCD, Birêz Ocalan û rayapêroyîya demokratîke hetgirê vindetişê hedîseyan bî. Hedef wedarnayîşê dormegirewtişê Kobanê bî. Xora çalakîyan ra dima Kobanê de bi destekê Hêzê Koalîsyonî yo Mîyanneteweyî abluqa ame şiknayîş.” 


NAVENDA XEBERAN