ALÎ GULER / ANF / STRASBOURG
Çalakîya ke seba wedarnayîşê tecrîdo girankerde ke Rayberê Şarê Kurd Abdullah Ocalanî ser de yeno bicaardiş, 23ê Teşrîna verêne ra nata bajarê Strasbourgî yê Fransa de yeno viraştiş, dewam keno.
Çalakîye roja 44. de ya û her roje hetanê cîya-cîyayan ra kesî beşdarê na çalakîye benî û destek danî çalakîye. Nînan ra yewe zî Derhênerê belgefîlma ‘Ocalan û Problemê Kurdî’ Luîs Mîranda yo.
Mîrandayî çalakîye zîyaret kerd û destek da çalakgêran. Mîrandayî çalakîye de va ‘ez heyranê Rayberê Şarê Kurd Abdullah Ocalanî ya’ û wina dewam kerd: “Ocalan rayberê bi mîlyonan o, cok ra şima nêşênî rayberê bi mîlyonan kesan şert û mercê tecrîdî de bitepişî. Ganî tecrîd bi hawayo lezabez bêro wedarnayîş.”
Feylesofo tewr gird o
Mîrandayî dewamê qiseykerdişê xo de dîyar kerd ke ê wextê antişê belgefîlme de Ocalanî hîna baş şinasnayo û wina va: “Ez o wext heyranê ci bîya. Yê ke mi eleqeder kerdêne, nasnameyê ci yê sîyasetmedar bî. Goreyê mi o feylesefo tewr gird o û ganî fikrê ci vilayê heme dinya bibî. Herçiqas ke hende serrî yo zîndan de yo, reyna zî fikrê ci resayî bi mîlyonan kesan û hetê bi mîlyonan ra yenî qebulkerdiş. Yê ke Rojawan de yenî cuyayîş, seba heme Rojhelato Mîyanên û dinya bîyî hêvî.”
Vindetişê Ewropaye merdimî xemgîn keno
Derhêner Mîrandayî dewamê qiseykerdişê xo de qala vindetişê Ewropaye yê vera tecrîdî de kerd û wina domna: “Sîyasetmedarê ewropayijî seba menfîetanê xo yê ekonomîkan bêveng manenî û no zî merdimî xemgîn keno. Ganî Ewropa bikewo têgêrayîşî mîyan û wayîrê heqê merdiman bivejîyo. Ez bawer kena ke lîderê Ewropa ferq bikerî ke seba Rojhelato Mîyanêno demokratîk û seyyewbînan azadîya Ocalanî ra derbaz beno. Eke Rojhelato Mîyanên de îstîkrar bibo, o wext do ameyoxa Ewropa zî biewle bibo. Yê ke no het de serbikewo kurdî yî. Tevgerê sîyasî yê ke Ewropa de yî, seba azadîya şarê kurdî hewl nêdanî. Ganî herkes destek bido têkoşînê azadîya kurdan.”
Fîlma Şorişê Rojawanî
Derhêner Mîrandayî peynîya qiseykerdişê xo de qala projeyêka xo ya newe kerd û wina dewam kerd: “Derheqê têkoşîno ke kurdî danî û Şorişê Rojawanî ser o projeyêk mi esto. Merdim nêşêno selahîyetdaranê televîzyonanê pîlan derheqê viraştişê fîlmê kurdan de îkna bikero, gelek zehmetin o. No het de tena kanalê ARTE eleqeder beno. Ez bi hawayo şexsî do seba kurdan projeyanê xo bidomna. Belgefîlma ke mi derheqê Ocalan û kurdan de viraştbî, tena yewe fîlm a ke derheqê kurdan de Ewropa de ameya weşênayîş. Ez wazena projeyanê xo yê winasîyan bidomna. Labelê no zehmetin o. Projeyê mi yê fîlma sînema esta. Ez wazena xîtabê kîtleyêka hîra bikera. Ez wazena bitaybetî ewropayijê ke kurd û Ocalanî qet nêşinasnenî rê şorişo ke Rojawan de virazîya, bida şinasnayîş. Saya na fîlme de do hem fikrê Ocalanî bişinasnî û hem zî tevgerê kurdî bişinasnî. Nika ez merhaleya senaryo de ya.”