Na tezkereye rê AKP, CHP û MHP raya ‘eya’, tena HDPe zî raya ‘ney’ da. Babete sero welatija ke bi nameyê ya Akkiz Durak ke Tarlabaşi de ronîşena vînayîşê xo ard ziwan.
Akkiz qalîkerdişê xo de bal ant ser şerê Sûrîyeye sero û wina verdewam kerd: “Ger ke lajê min lejker bibînê, min qebul nêkerdênê. Çi karê lajê min Sûrîyeye de esto; Sûrîye dişmenê ma nîya, dostê ma ya. Êy merdimê ke weyra de yî, merdimê ma yî. Xora Erdogan verîya nika Esad rey zaf samîmî bi. Hetta êy ra vatênê ‘birayê min’ eyro sebi ke wina vano. Beyntarê înan ra çi vîyart; gelo verg vîyart, an pisîng vîyart, yan zî mere vîyart? Her roj cenazeyê lejkeran yeno. Gelo humara cenazeyê ke yenî tay ame? Qey ma domananê xo semedê înan anî dinya. Ma domananê xo bi feqîrî, bi mehîrî weye kerd. Nika ez senî lajê xo bieşrawa lejkerî? Sewbîna karê înan çino qey?
Qanûn wina nêbeno
Akkiz qalîkerdişê xo de vatişê Yarbay Mehmet Alkan ard vîr û wina domna: “Xora zaf kes mirenî. Hetê nêyî de êy ke cenazeyan de bermenî rê, êy ke vanî aştî rê, êy ke nêwazenî lajê xo feda bikerî rê û sewbîna kesan rê ceza yeno dayîş. Qanun wina nêbeno. Ez wendiş-nuştiş nêzana, nika yew kaxiz bidî min, ez nêzana ke îmzeya xo bierza. Labelê ziwanê mi bi qewet o. Ez bi ziwanê xo, lajê xo nêdana ti kesî. Labelê Erdogan wazeno heme neslê ma çin bikero, ser hardê ma de wazeno ma biqedêno. Ez semedê domanan her roj dua kena.”
Lazim o heme vacî aştî
Akkiz ciresna ke lazim o aştî bibo raşt û qalîkerdişê xo peynî kerd: “Ger ke ma tîya de pê rey werd wenî se, wexto ke yewna ame ser sifre, lazim o ma sifreye kom nêkî. Çimkî ger ke ameyo se, dêmek qismetê ci zî esto û o zî do ma rey de biwero. Semedê çi limnenî, semedê çi raştikên ra aştî nêvirazenî. Qanûn û nîzam zî esto. Meslîs de Kiliçdaroglu, Bahçelî, Demîrtaş û yew zî Erdogan esto. Ger ke vacî aştî wa zerreyê înan ra bêro û wa dima vacî aştî. Wina tena fek reyde vatişê aştî nêbeno.”
JINHA/STENBOL