Zey dayika Gulîzar... Ay pêrokîn domonê Kurdistan virardin kerd û zerya xo de star kerd. Zey domonanê xo kesî ciya nêkerd. Çêberê zerya xo pêrokîn xoverderanê Kurdistan'î ra akerd. Nayî ra a maya pêrokîn Kurdistanijan a.
Serranê qiyamet, pûg û zemherî de amêbî dîna. Domoniya xo de çimanê ayî şahîdiya qirkerdisê des hezaran kesan kerd. Tertela Dersîm jê kul û jana pîl heta nefesê ayê peynî zerya ay de mend. Maya Gulîzar a ke zey zerî-dirbetî terteleyê '38'î ra xelesya, pêrokîn ciwyana xo de verra nêheqî, verra zilm, jordarî, qirkerdin û mixacîrî xoverda.
Ayî tenya tertelê Dersîm rê nê, herzewbîn ronayişê hereketê serbestî yê Kurdî rê zî şahidîy kerd. Seweta ke domonê Kurdistan vejyayê û îyê dê heyfê tertela Dersîm, heyfê Sey Rizayan, yê Zarîfeyan, yê Şêx Seîdan, yê qirkerdişê Mereş û îyê dê heyfê qetilkerdişê se hezaran Kurdistanijan bicîrê zeyra maya Gulîzar bena şa, çimê ci benê roşnî. Bi na îtiqat, bi na omid û pawitiş domonanê xo ra piya zerreyê na dawa de, ca girot. Endî Dayika Gulîzar de ne ters û xof, ne kî vinderdiş maneno. Gencê ke Kurdistan bixelesnê rê, 'Domonanê xo rê' Apociyan rê kêberê keyeyê xo, zerya xo, virardena xo akena û wayirî kena.
Wext yeno Dayika Gulîzar raştê tehdîdanê dişmenan yena, kewna zindan, îşkenceyê giran vînena. La kes û teva nêşeno adiro ke zerya ay de fiştrayo ci defîno û ay na rayî ra ageyrîno.
Dayika Gulîzar seweta xelesîna Kurdistan ponc domonê xo riştî dawa serbestî. Ayî goreyê menfaatanê malbatî nê, goreyê menfaatanê welatê xo, hardê xo fikir kerd. Zonayiş, felsefe û fehmkerdişê ayê ciwyanî hondayi hera bi.
Ceniya xoverdêr û serhewadêr yê Dersîm dayika Gulîzar a ke verniya dişmenanê xo de ti wext serreyê xo nimz nêkerd raya bi hezaran domonanê xo ebi fikr û felsefeyê xo roşn kerd. E ke xoverdayişê Dayika Gulîzar, Dayika Hatice, Dayika Durrê û yê bi hezaran Dayikanê Kurd nêbiyaybi, tekoşinê serbestî nêşiya bireso no merhale.
Tekoşinê serbestî yê Kurd de, yê ke bi emeg, bi gan, bi gonî bedel û poştdayinê girdî day dayikê Kurdî yê. Nê dayikî pêrokîn emrê xo de jû roz kî cayê xo de nêvindiyay. Heta ke ser payan de bî tiya ra vazday ewja.Kesî jê nê dayikan janê pîlî nêant, hondayî bedelê giranî nêday. Ê Kurdistan de jê darê şinayêr-çinêr heta asmenan bî derg û pêrokîn Kurdistan de boy day.
Zey Dayika Gulîzar, Dayika Hatice Altûn a ke 13'ê Temûz de sirgûn de weşiya xo kerd vinî kî dawayê xelesnayişê Kurdistan de bedelê gird û giran day. Ay kî domonanê xo ra heta tornanê xo bi gan û mal na dawa de ca girot.
Nê dayikan ver kêberanê zindanan de nobedê domonanê xo girotî. Mazlûm, Kemal, Xeyrî û Sakîneyan rê wayirî, mayî kerdî. Eştinê toximê dawa xelesnayiş welatî rê şahidîy kerdî.
Nê Dayikê miqades yê ke raştê heqaret, îşkence, û nêheqiyanê dişmenan amey rayê heqîqet ra ti wext nêageyray û heta peyniyê nefesê xo zerya înan ebi xeyala 'hardê
azad' da piro. Ê çimî rakerde nêşî raya heqî. Çi ke îyê rind zanê û niya îtiqat kenê ke, domonê înan na raya heq u heqîqetî ra fek nêviradanê.
Zey çêney, laz, domon û tornê înan ma deyndarê nê Çinêranê. Ma deyndarê înanê ke xeyal û waştena înan biyarime ca. Dayika Gulîzar ebi Dayika Hatîce, ebi ceniya serhewadêr Sakîne, ebi Sey Rizayan piya mijdaniya xelesnayişê welat pîtena.
Oxir vo dayika Kurdistan, dayika kowu! Oxir vo ceniya serhewadêr, sembola ceniyanê xoverder yê Kurdistan, şinayêra Dersîm.
Dawa û xeyalê sima emanetê ma yê. Lew nan hardê to.