Turkalî 13ê Gulan 1919î de sûka Tirkîye Samsûn de ame dinya. Lîseyî Samsûn de wend. Serra 1942 de Fakulteyê Edebîyat ê Zangehê Stenbol ra beşê Ziwanê Tirkî û Edebîyatî ra mezûn bi. Turkalî bado ke Lîseyê Lejkerî yê Maltepe û Kulelî de mualimîya edebîyatî kerd 1951 de tepêşîya û 9 serrî ceza girot. Badê 7 serranê tepiştişî serbest veradîya. Turkalî bi Rifat İlgazî ra pîya Weşanxaneyê Garî rona.  1960î de destpa nuştişê senaryoyî kerd. 1965î de rîwalê filîmê  xo yê  ’Yê ke taritî de hewn ra werzîyay’ xelatê senaryoyê tewr rind yê Festîvala Fîlmê Porteqala Zerrîn yê Antalya girot. 


Rîyê xo çarna tekoşînê serbestîyê kurdan

Nuştox Vedat Turkalî ke zey edebîyatvanê tewr gird yeno silasnayen xêlê kitabî nuştî. 1974î de pêşbirkê roman yê Weşanê Mîllîyet de xelatê jûyînî, 1976î de zî Xelata Romana Orhan Kemalî girot. Û 2016î de zî layiqê Xelatê Edebîyatê qaqlîbaza spî ame vînayen.  Turkalî ke qadroyê Partîya Komunîst yê Tirkîyeyî bi Weçîntayişanê 2002 de DEHAP ra bi namzet û wextekê kilmek siyaset de bi aktîf gurîya. 

Şinayêrê pîl Vedat Turkalî xêlê reynî programanê televîzyonî de Rayverê Şarê Kurd Ocalanî ke zey ‘Alwoz Ocalan’ xîtab kerd rê selamî ruşna û waştena xo ya rey Ocalanî de pêdiyayişê ard ser ziwan. Zerrîya Turkalî heta nefesê peynî seba haştîyeke bêsînor û waûbirabîyena şaran da piro. Cenazeya şinayêrê pîl do ewro Mezelxaneyê Zîncîrlîkûyû de defin bibo. 


Do zerrî û mezgan de tim û tim biciwîyo

Seba wefata Turkalî de xêlê mesajê serweşî amey weşînayen. KCK, HDP, DBP, KCD ra pîya xêlê sazgeh û rêxistinanê kurd zî mesajê serweşî day.  Hevserokanê HDP Selahattîn Demîrtaş û Fîgen Yuksekdag zî wefatê Vedat Turkalî ser o xemgînînê xo ard ziwan û keyeyê Turkalî û şaranê Tirkîyeyî rê serweşî wast. Demîrtaş û Yuksekdag vistî vîrî ke Turkalî, wîjdanê çep ê edebîyatê Tirk û nûştoxê şoreşgerbi. Hemserokanê HDP mesaja xo de aşkere kerdî ke ‘Vedat Turkalî do zerrî û mezgan de tim û tim biciwîyo. Mesaja HDP de vajîya ke romanê ke Turkalî nuştî tarîxê tekoşînê sîyasî û civakî rê roşnî girot û taritîyan roşnî kerd. HDP rîwalê şîyayişê heqî malbat û dostanê Turkalî rê serweşî waşt.  Kongreyê Civakê Demokratîk KCD zî, wefatê Vedat Turkalî ser, mesaja serweşî kerd vila. KCD keyeyê Turkalî û şaranê Tirkiye rê serweşîn wast.


Alwozê erja yê tekoşîna ma yo

Derheqê Turkalî de jû mesaja serweşî zî KCK ra amê. KCK aşkere kerd ke Vedat Turkalî şoreşgerekê gird û nuştoxekê namedar bi û va ‘Vedat Turkalî alwoz û dostekê bi wefa yê kurdan bi. KCK malbata Turkalî û heskerdoxanê ci ra serweşî waşt û veng da kurdan ke tewrê merasîma cenazeya ci bibê. KCK ser nameyê Rayverê Şarê Kurd Ocalanî zî malbata Turkalî û şaranê Tirkîyeyî rê serweşî waşt û wina va: “Ma ey rê sozê ca ardişê vîra şaranê azad û Tirkîyeya demokratîk danê û zey alwozekê erjaye tekoşîna xo  de bidê ciwîyayen. 


Hemşaredaranê Amedî ra mesajê serweşî

Hemserekê Şaredarîya Şaristanê Girdî yê Amedî Gultan Kişanake û Firat Anli, seba merdişê edebîyatkaro westa Vedat Turkalî mesajê serweşî weşana. Mesajê hemşaredaran de wina ame vatiş “Cayê edebîyatkaro westa Vedat Turkalî nêno dekerdiş. Ma merdişê ey ver zaf xemgîn ê. Ma keye û şarê ma rê serweşî wazenê.  

Hemşaredarê Sûka Girdî yê Amedî Gultan Kişanake û Firat Anli, seba merdişê edebîyatkaro westa Vedat Turkalî mesajê serweşî weşana Mesajê hemşarederan de wina ame vatiş: ‘Edebîyatkaro westa Vedat Turkalî her tim vato ‘ Ma do seltenatê Heramîyan birijnê.’ Turkalî 97 serrî ciwîyayo û emrê xo seba mucadeleyê bindestan feda kerdo.  Ma merdişê ey ver zaf xemgîn ê. Cayê edebîyatkaro westa Vedat Turkalî çi rey nêno dekerdiş. Ma ey bi hurmetî yad kenê, keye û şarê ma rê serweşî wazenê. 


 NAVENDÊ XEBERAN