Seba Turkalî vizêr Camîya Teşvîkîye de merasîma cenaze virazîya. Hemserokanê HDP, parlementerê HDP, temsîlkarê ODP, CHP, KESK ra pîya xêlê nuştox, sîyasetmedar, dost û heskerdoxê ci tewr bî.
Demîrtaş ke malbata Turkalî rê serweşî waşt dima ra çapemenî rê qisey kerd û aşkere kerd ke erjayekê zaf gird vindî kerdê. Selahattîn Demîrtaşî ard ziwan ke ey rojekê zaf bi mane de oxir kenê û va: “Seba haştîyeke bi rûmet emegê ey ê zaf girdî estê. Ma ey Roja Haştî yê Dinya de oxir kenê. Mîraso ke ma rê terna zey ferman o. Welatê ma de haştî do hetê kesê ke zey ey fikirîyenê bîro. O zey fizîkî ma ra abirya, la eserê ci dê her tim civakî de bê. Hemseroka HDP Fîgen Yuksekdag ke cewab da persanê rojnamegeran zî aşkere wina va: “Turkalî seba ma keseko tarîx û na roj û meştî temsîl kerd bi. Ma bi şîîre, roman, vate û zonayişê ey bî roşn. O mordemê xoverdayişî bi. Heta nefesê xo yê peynî seba azadîya pêrokîn şaranê dinya xoverdayişî de dewam kerd.
Şermê polîsanê tirk
Badê ca ardişê wecîbeyanê dînî bi hezaran kesê ke cenaze girotî doşanê xo bi panqarta “Dostê şaran û haştî oxir kenime” berdî Mezelxaneyê Zîncîrlîkûyû. Şêligo ke qernefîlê sûrî eştî tabûtî ser slogananê “Herbî rê nê, haştî desince nika” berz kerdî.
Rixmê hewldayenê manîkerdişê polîsan şêligî bi slogananê “Dûştê faşîzmî doş bi doş” rayşîyayişê xo dewam kerdî. Polîsan mudaxaleyê şêligî kerd û posterê Turkalî destê heskerdoxanê ci ra girot û eşt ver lingan. Nuştoxê hosta Vedat Turkalî rixmê pêrokîn provokasyon û bêtehamulîya polîsan hetê dostan û heskerdoxanê xo Mezelxaneyê Zîncîrlîkûyû de ame definkerden û destpa hewna hetahetî kerd.
DÎHA/STENBOL