Referandûmê 16ê Nîsane ra 3 rojê peynî mendî. Bi nêzdîbîyayîşê referandûmî ra, kişta asayîşê sindoqan de xebatê partîyanê sîyasî û hereketê aktivîstê zerrîdar ver bi netîcebîyayîşî şinê. HDP û CHP, dê roja weçîntayîşî de bi sehezaran wezîfedar û bi sîstemê taqîpkerdişê sindoqan, sindoq û vengan bipawê.
Seba referandûmê teslaqê qanûna bingeyîn mordnayîşê peynî destpa kerd. bi mîlyonan weçîntoxî iyê dê roja yewşeme şirê ser sindoqan. Cepheyê “Nê” û “Ya” dê rojanê xo yê peynî meydanan de ravêrnê. Nayî ra pîya cepheyê “Nê” û hereketê aktivîstê zerrîdar ê xoser, seba ke wextê reydayîşî û badê reydayîşî de rewşekê xirab nêvejyo, nika ra tedbîran gênê. HDP û CHP, seba rayî ver mudaxalekerdişê netîceyanê sindoqan bigîrê, sîstemê taqîpkerdişê sindoqan yê taybet ronenê. Seba mudaxalekerdişê rewşê xirab yê wextê vengdayîşî de zî bi sehezaran wezîfedarê sindoqan û muşahîdî amey wezîfedarkerdiş.
CHP ra 300 wezîfedarî
Yardimkarê Serokîna Pêroyî yê CHP Erdal Aksunger, derheqê babed de agahî da û vist vîrî ke, zey CHP iyê dê roja weçîntayîşî de bi 300 hezar wezîfedaran sindoqan bipawê.
Aksungerî aşkere kerd ke înan weçîntayîşanê 2015î de bi bernameyekê çîynermê komputure netîceyê sindoqan taqîp kerd, înan seba refernadûmî zî no bername aktuel kerdîyo. Aksungerî da zonayen ke, iyê dê 81 sûk û 970 qezayan de bi no bernameyî netîceyanê sindoqan taqîp bikerê û gam bi gam bi netîceyanê YSK ra pêveronayîşê. Erdal Aksungerî dîyar kerd ke kişta tîvarîyê sindoqan de, ganî wezîfedarê sindoqan û muşahîdî ser sindoqan de bê û raya ver manîpulasyonî bigîrê.
HDP 100 hezar ra vêşî kesî wezîfedar kerd
Herzewbîn do Partîya Demokratîk ê Şaran (HDP) zî, seba verîgirewtişê mudaxaleyan, do roja weçîntayîşî bi çîynermê komputure netîceyan taqîp bikero. HDP zî seba asayîşê sindoqan 100 hezar ra vêşî wezîfedarê sindoqan û muşahidî diyar kerdo. Enqere, Amed û Stenbol de 3 maseyê krîzî do ronîyo û nê maseyan de hezar ra vêşî pawitoxî dê ca bigîrê.
‘Nika ra ‘Nê’ serkewto
Roja weçîntayîşî, tenya partîyê siyasî nê, herzewbîn do bi seyan aktivîstê zerrîdar zî ser wezîfe de bê. Xêlê platformê zey “Oy ve Otesî”, “Oy’um Guvende”, “Demokratik İtiraz Hareketi”, “Hayır ve Ötesi”, no wextekê derg o, seba tîvarîya sindoqan xebatan aver benê. Platformê "Hayir ve Otesî" ra Dogan Ergunî vist vîrî ke di aşmî ra vêşî wexto ke ê hadreyînan ramenê. Ergunî aşkere kerd ke ê xoser ê, la bêhetî nîye û wina va: “No referandûm, referandûmekê ke kes bêhetî bimano nîyo. Hedefê ma no yo ke ma vengê ‘Nê’ bipawê.
Aktivîstê Platformê "Hayir ve Otesî" Dogan Ergunî dîyar kerd ke weçîntayîş şert û mercanê têduşt nîye de virazîyeno û va, nika ra ‘Nê’ serkewto.
‘Sindoq emanetê to welat emanetê to’
Aktivîstê Platformê "Hayir ve Otesî" Dogan Ergunî veng da welatij û kesê wezîfedar ke, roja referandûmî de heta ke netîce nîrê aşkerekerdiş, ganî pêrokîn welatijî wezîfeyê xo ra fek vera nêdê. Dogan Ergunî va, ‘ma ra kes nêşeno vajo ke sindoqî tîvarîye de yê û wina va: “Eke kesê ke nêeşkê vengê xo bipawê, iyê dê seba ameyoxê welatî nêbê wayîrê vatişî. Hemverê ma de îqtîdareke faşîzan esta. Wezîfeyo ke kewno ser doşê ma no yo ke, ma sindoq û vengan zey rûmeta xo bivînê û bipawê. Zey “HAYIR ve Otesî” ma welatijanê xo ra nayî vanê; 'Sindoq emanetê to ya, welat emanetê to ya."
DÎHABER/ENQERE