Xoverdayîşê xoserîye yê Şirnexî ke vera hêrişê dewleta tirkî de amebî nîşandayîş, 14ê adara 2016 ra heta 3ê hezîrana 2016 dewam kerdbî. Wextê xoverdayîşî de artêşa tirk xeylê zaîyat daybî û demêko derg nêşênaybî bikewa cayê ke tede xoverdayîş esto. Serrgêra xoverdayîşê xoserîye de şerwanê YPSyî Zagros Şirnexî qisey kerd.
Zagros Şirnexî va ‘badê ke dewleta tirk Şirnex de Haci Lokman Bîrlîkî qetil kerde, Şirnex de xoverdayîş dest pêkerd’ û wina qala xoverdayîşê 82 rojan kerd: “Şirnex merkezê Botanî de yo û bajarê xoverdayîş û serewedaritişan o; heta nika qet koletî û teslîmbîyayîşî qebul nêkerdo. Dewlete Haci Lokman Bîrlîko ke welatperwer bî qetil kerde û pey panzerî de kirêşt. Şarî na rewşe qebul nêkerd. Vera nê hêrişanê hovaneyan de 1-2 taxan de barîkatî ameyî ronayîş û xendekî ameyî kinitiş. Bi no hawa hewl dayî qetlîyaman bidî vindarnayîş. Xoverdayîşo ke 82 rojan dewam kerd, heme Şirnexî ser de vila bî.”
Psîkolojîyê înan xirab bî
Zagros Şirnexî dewamê qiseykerdişê xo de va ‘artêşa tirk vera xoverdayîşê ciwananê Şirnexî de zaîyatêko gird daybî’ û qiseykerdişê xo wina domna: “Bitaybetî xoverdayîşê embaza Zeryane Şirnexî ser de tesîrêko gird kerdbî. Artêşa tirk psîkolojîyê tersî cuyayêne. Artêşe hêzê xo yê taybetan ardêne Şirnex û waştêne ke bi no hawa netîce bigira. Labelê vera xoverdayîşê ciwanan de têk şîyî û zaîyatê girdî dayî û psîkolojîyê înan xira bî.”
Şarî sere nêrona
Zagros Şirnexî peynîya qiseykerdişê xo de wina va: “Wexto ke artêşa tirk bi hawayo topyekun hêrişê Şirnex kerd, vera nêyî de ciwanan zî ruhê seferberî da destpêkerdiş û beşdarê xoverdayîşî bîyî. Zaf hetanê Kurdistanî ra ciwanan vera xo da Şirnex û mîyanê têkoşînî de cayê xo girewtî. Nê xoverdayîşî de zaf qehremanîyî ameyî cuyayîş. Nê qehremanîyî açarîyayî destan.
Ma do înan xo vîr ra nêkerî
Ma do nê xoverdayîş û qehremanan xo vîr ra nêkerî. Ma do têkoşînê înan gird bikerî. Şarê ma zî do nê qehremanan xo vîr ra nêkero û do rayîrê înan de bimeşo. Se beno wa bibo şarê ma do sere nêrono. Cok ra ez embazê ma yê ke xoverdayîşê bajaran de û pêroyîya têkoşînî de şehîd kewtî, bi rêzdarî yad kena.”
ZEYNEP NERGÎZ BOTAN / ANF / BEHDÎNAN