Sîyasetê kurdan ra tersenê.
Na semed ra nêvardenê hereketê sîyasî yê kurdan legal sîyaset bikerê.
Sermîyanê tirkî vanê ‘kurd ke zor kar mîyarê, şîkînê fikrê xo ebi sîyaset araze kerê.’
Zaerrê na vatîşî tiptal o. Numunê naye zaf yê. Hîre serrî ra na het dewa KCK na hal rê en emsalo araze wo.
Dewlet û hukumatê tirkî verecoy vengê xo nêvezenê û vanê ‘herkes şîkîno fikrê xo vazo.’ Dima pînê juyî ke fikrê xo vat desinde cenê erzenê hepis. Nîyadê weçînîtîsê mahallî yê serra 2009 ra na het çiqas însanî amê guretenê û hepisxanan derê. Nînan ra keşî zor kar nêardo, teyna fikrê vato.
Vajîme ke nînan bêzor vurnayena sîstema faşîste wasta, na heqa her keşî ya. Eke sîyaset de çîyo nîyanen nêbî, o waxt her çî beno jû. Tirkîya de tam na esta. Wastena AKaPe na wa. Na partîye jû veng û jû reng wazena. Dîktatorîye na wa. AKaPe cematê qesey kerdene û hurenayîşî nêwazena. Herkeşî ra vana ‘jê ma qesey bikerê, jê ma bifikrîyê.’
Tirkîya de bi serdest bîyayena AKaPe statuko nêvurîya, teyna dest vurna. Hayleme zelemele dîna gurete binê bandire, hama tewa nêvurîya.
Însanê ke qesey kenê, cerînê zerre, însanê ke heqa xo yê numayîşî anê kar cerînê zerre, înasanê ke gorê xo sîyaset kenê, cerînê zerre.
Mesela halkerdena heqanê kurdan de na hukumatî game nêeste. Statuko hen mend. Ne zonê kurdan wendexanan de bî fermî, ne herfê kurdî qebul bî. Vatîs vurîya pratîk mend.
AKaPe roz bi roz generalanê qetilkaran rê tenena jede wayîr vejîna. Sîstema huqukî gureta binê destê xo, nêverdana verva nî generalan dewa bêro rakerdene, hesav bêro pers kerdene.
Nunera statukoyê kanî nika AKaPe wa. Virara emperyalîstan de nîşta ro, wazena kurdan qirkero. Çi hazetê qirkerdene ke esto, nî dostanê xora cena.
Kamo ke vano ‘AKaPe statukoperset nîya’ o zurkeno.
Eke statuko nêsevknenê, nika bi hezaran kurdî teyna rîwale fikir vatene ra hepis nêkerdenê.
Eke statuko nêsevknenê, nika gerîllaye kurdî bi qazanê kîmyevî nêkistenê.
Eke satuko nêsevknenê, nika Tirkîya de bi seyan televîzyonê kurdan bîyenê.
Eke satuko nêseveknênê, her roz BDP tehdît nêkerdenê.
Na lîste mordem şîkîno hona zaf derg kero.
Naye ra avê teyna hukumatanê tirkî qirkerdena kurdan rê ferman dênê, nika endî faşîstî jê Fetullah Gülen kî seweta tertelê kurdan fetva danê.
RTE her roz çapemenîye tehdît keno. Hora leto jede yê çapemenîye lewê hukumtî dero.
Di-hîre rojnamevanan ra qederî hora keskî verva tehdîtanê RTE nêvejîya.
Zafîne rê tehdîtê Erdoğanî bî mane û tek tek ginayî waro.
Nika postalanê hukumatî lêsenê.