SKB, 3. serragêra qetlîama Parîs de, serva ca ardinê edalet û perskerdişê hesabê ci, veng da ceniyanê goçber ke 9ê Çile de tewrê nûmayişê protestoyî yê Parîs bibê.
Jûbiyena Ceniyanê Sosyalîst derheqê qetlîama 9ê Çile de damûstayîn weşîna û hayr ant qetilkerdişê 3 ceniyê ke Sîlopî de amey kişten ser. SKB aşkere kerd ke, na qetlîam pêrokîn şarê Kurd û ceniyan rê jû mesaj a. Serdestê Seray mesajê ‘eke şima tekoşîn bikerê, serbestî biwazê, peyniyê şima zî do wina bo’ danê.
Ma meydanan terk nêkeme
SKB qetlîama Çile 2013î vist vîrî û aşkere kerd ke, na qetlîam verra tekoşîna serbestiyê şarê Kurd û werziyayişê ceniyan de viraziya. Faşîzmo ke, vejîyayiş û xoverdayişê ceniyan hezm nêkerd, ebi nê raybazanê qilêrîn waşt netîce bigîro. SKB aşkere kerd ke, nê hewldayenî nafîle yê, çi ke a roj ra na het ceniyan meydanî terk nêkerd û tekoşînê xo berz kerdî.
SKB ard ziwan ke, Sakîne, Fîdan, Leyla, Yelîz, Şîrîn, Sevê, Pakîze, Fatma, Gunay, Dîlek, Dîlan, Ekin sembolê tekoşîna serbestî, abîdeyê rumetî yê.
Damûstayin de niya vajiya: “Ma zanê ke, tekoşînê serbestî û edalet do bireso hedefê xo. La, wa bekçiyê taritî bizanê ke, her guleyo ke şima eşt, do ebi serhewedayinanê ceniyan ageyro şima. Ma cenî, matemê kesê ke ma vindî kerdî nêgênê. Ma cenî, kuçeyan de ebi nûmayişan verniya qetilkerdişê ceniyan de vindeme.
Vengê xo berz bikerime
SKB 3. serragêra qetlîama Parîs de, veng da ceniyanê goçber yê ke Awrûpa de ciwyenê tewrê nûmayişa 9ê Çile yê Parîs bibê û verniya qetlîaman vengê xo berz bikerê.
TJKE û KCD-E zî roja verî damûstayîn da, ceniyan, Kurdistanijan û çormeyanê azadîwaşt ra waştî ke 9ê Çile de şirê Parîs û verniya rejîma dîktatorî vengê xo berz bikerê. Nûmayişê vîrardiş 9ê Çile, ver îstasyonê tren Gare du Nord de, seat 10:00î de dest keno ci. ”
ANF/NAVENDÊ XEBERAN