Qezaya Soma ya Manîsa de 13ê gulana 2014 de cînayetêk karî virazîyabî û netîceyê ci de 301 karkerî merdbî. Her çiqas ke hedîse ser ro 3 serrî derbaz bîyî zî heta nika çîyêk nêbedilîyayo. Madeno ke tede hedîse qewimîya hîna zî padaye yo. Karkerî vanî her çiqas ke hedîseyî ra dima tayê çîyî bedilîyayî zî, zafaneyê şert û mercan sey verên î.
Karkerî dîyar kenî ke şert û mercê înan her ke şono xirabên beno. Babete ser o karkerê madenî qisey kerdî.
Verê coy zî cînayetê karî amebî cuyayîş’
Karkero ke nameyê xo nêwaşt bido, va ‘cayo ke ez xebetîyena de verê cû cînayetê karî amebî cuyayîş’ û wina domna: “Labelê seba ke merdimî mecbûr î ke bixebetyî, cînayetê karî zaf rew ame vîrîkerdiş. Ez verê cû madenanê Zonguldakî de xebetîyaya, seba ke ê madenî ameyî padayîş, ez mecbûr menda ke bêra Soma.Tayê tedbîrê ke Zonguldak de estbî, Soma de çin î. Her çiqas ke maaşê karkeran zêde bîyo zî hetê ewleyîya karî de ti tedbîrî nînî girewtiş.”Karkero bi nameyê Ufuk Mîrvanî zî dîyar kerd ke vetişê komirî canê karkeran ra hîna muhîmêr yeno dîyayîş û wina va: “No her tim hetê patron û wezîfedaranê madenî ra yeno vatiş. Demanê peynî de karkeran ser de zext û zordarîyî zêde bîyî. Cayo ke barê karkeran hende zêde bîyo de îxtîmalê qewimîyayîşê cînayetê karî zî gird o.”
E. ALAYUMAT/S.YAŞAR / DîHABER / MANÎSA