Panelê sifteyîn yê roja peynîyîn de vizêr, Rojhelatê Mîyanî de meseleya azadîyê cenîyan amê qiseykerden. Panelo ke moderatorîya ci Wezîfedara Zangehê Bexda Ferah Sabir kerd de Azaya Koordînasyonê KJA Ceylan Bagrîyanik, Azaya Koalîsyonê Cenîyanê Tûnis Saloûa Gûîga, Hemseroka PYD Asya Abdûllah û Serokê Kantona Kobanê Enwer Muslîmî qisey kerdî.
Enwer Muslîm ke derheqê camêrdo ke bi şoreşî vûrnîya ser de qisey kerd vist vîrî ke Şoreşê Rojawa de aktorê tewr aktîf cenî yê. Muslimî aşkere kerd ke cenî her cayê civakî de rolê pêşengî kay kenê û qiseyanê xo bi waştişê serbestîyê Ocalanî qedîna.
‘Felsefeyê Ocalanî biwanê’
Badê Muslimî Azaya Koalîsyonê Cenîyanê Tûnis Saloûa Gûîga panelî de qisey kerd û hayr ant ‘Dinyayê Ereb de geyrayişê azadî û tecrûbeyanê ci’ ser. Gûîga vist vîrî ke Ocalan serva ke Rojhelatê mîyanî û pêrokîn dinya de haştî bîro tekoşîn keno.
Aktivîsta Tûnisijî da zonayen ke herbo ke Rojhelatê Mîyanî de yeno ramiten de heqê cenî û domanan çinî yenê hesibnayen. Saloûa Gûîga aşkere kerd ke sebebê Rojhelatê Mîyanî de çinî hesibnayişê cenîyan îslamê sîyasî yo û va serva têşûştîya cenî û camêrdan ganî felsefeyê Ocalanî bîro waniten û zanayen. Peynîyê qiseyanê xo de Gûîga da zonayen ke cenî dê meydanan de tekoşînê xo hewno vêşî berz bikerê.
Şoreşê neolîtîk ra na het
Badê Saloûa Gûîga Azaya Koordînasyonê KJA Ceylan Bagrîyanik bin nameyê sernuşteyê ‘Şoreşî mîyan de raştîya şoreşî’ de qisey kerd û behsê estanika tarîxê tekoşînê cenîyan kerd. Bagrîyanik vist vîrî ke civakbîyayen çormeyê cenî de virazîya û hayr ant şoreşê neolîtîkî ser. Bagrîyanik da zonayen ke sîstemê kapîtalîzm de cenî açarnîya kole û aşkere kerd ke meseleyê civakî zî ser kolebîyena cenîyan de vejyayî werte. Azaya Koordînasyonê KJA Bagriyanik zî qiseyanê xo bi protestokerdişê tecrîdê dûştê Ocalanî qedîna.
‘Cenî Rojawa de serkewtî’
Panelî de tewr peynî de Hemseroka PYD Asya Abdûllah derheqê babeda ‘Sîyaset û demokratîkkerdişê civakî de şoreşê cenîyan’ de qisey kerd. Abdûllah hayr ant pêvacoyê Şoreşê Rojawa de tecrûbeyê cenîyanê kurd ser û va, zey cenî ma serva camêrdan ne mecbûrê merdişî, ne zî ciwîyayişî yê. Asya Abdûllah vist vîrî ke Rojawayê Kurdistanî de sîyaset de, weşî de, qadê lejkerî de cenî pêşengî de serkewtî û wina va: “Cenî her cayê sîstemî de bi quwetî yê. Xêlê qanûnê ke heqanê cenîyan seveknenê vejîyayî.” Abdûllah peynîyê qiseyanê xo de vist vîrî ke Şoreşê Rojawa şoreşê cenîyan o.
Panelê 2. yê ‘Înşayê Ekonomî’ ke moderatorîya ci Seroka REPAK Meral Çîçek kerd de Midûra Navendê Cipersyayişê Programê Weşbîyayen yê Mavên netewî Leo Saldanha û Ronayoxa Projeyê Ekonomîya Komunal yê Bistanên Rojawa Nahîde Zengîn qisey kerd. Panelîstan hayr antî sebebê qrîzê ekonomî yê nikayî û ekonomîya komunal ser.
ROJNEWS/SILÊMANÎ