Şoreşê Rojava 2 serrî ra avê 12ê asma temuze Kobanê de dest kerd ci. Kurdanê Rojava polîtîkade baqile ramite. Herbê zerrî de ne lewê rejîma Esad de, ne kî lewê komanê muxalefetî de ca guret. Herkesî wastenê ke kurdî onca ver kuyê verva rejîma Esad pêrodê. La kurdan hen nêkerd. Kurdan sebir kerd, xo organîze kerd, roza xo pîte. Kurdan zonenê eke onca ver kuyê verva Esad pêrodê, peyniye de onca dest tol vejînê. Rejîma Esad rê hora tîvarê kurdan çîne bî, vatîs û niyadayîsê komanê muxalefet yê kurdan kî yê Esad ra tenena xiravin bî. Komanê muxalefetî wastîsê kurdan destcikerdene de qebul nêkerdî. Komê muxalefetî nijadperestê ereb bî. Suriyeda demokratîk armancê nî koman nêbiye. Wastenê Komara Erebî yê Suriye ronê. Kurdan tarîxê xo de niyada, na raye serva kesê bînî pêronêda, goniya xo nêrisnê. Dima, 12ê asma temuze yê serra 2012 kurdan niyada ke komê terorîstî jê El Nusra dest kenê herdê înan, kurdî wistî ra payî herdê xo pawit. Peyderpey kurdan sukê xo guretî xo dest û dima kî xoseriya xo bi ronayena Kantonan îlan kerde.

Taye kurdî Şoreşê Rojavayî înkar kenê û vanê “Rojava de şoreş nêbiyo.” Bi taybetiye siyasetvanê başurî yê PDK naye anê ra zon. La, ma zoneme ke Nato û Amerîka ke nêbiyenê Başurê Kurdîstan kî serbest nêbiyenê. Rind ke Nato 1992 de dest kerd ci kurdê Başurî seveknayî û rind ke Amerîka 2003 de kewte Iraq û kurdî restî serbestiya xo. 1992 ra na het kurdanê Başurî ne Şengal, ne kî Kerkuk tewrê herdê xo kerd. Kurdê Başurî gune rind bizonê, kam ke Şoreşê Rojavayî qebul nêkeno, O torjên sone keno, dano zoniyê xoro. Çike hata ke kurdî jû nêbî, piya hereket nêkerd, serbestiya jû cayî fanî ya.
Bakur û Şoreşê Rojava: Şarê ma yê Bakurî ver ra na het poşt dano Şoreşê Rojavayî. Hora şarê ma yê Rojava kî ver ra na het zerrê Hereketê Serbestiye yê Kurdan de ca ceno. Siyasetvanê Bakurî her tim Rojava de ameyî seveknayene. Yardimê şarê ma yê Rojavayî ke nêbiyenê, belka kî Hereketê Serbestiya Kurdan nêbiyenê. Kurdê Bakurî naye zonenê û na semed ra lewê Şoreşê Rojavayî derê. Tabî Bvakur de kî taye xizmetkarê kolonyalîstan estê, verva Şoreşê Rojavayî vejînê. La, kurdê Bakurî leto jede bi can û malê xo lewê Şoreşê Rojavayî derê. Bi taybetiye nî rozanê peyenan de gencê kurdî Bakur ra sonê Rojava. Seweta nî gencan hukmê şîndoran endî nêmendo. Îta de kî beno zelal ke en jede şarê Bakurî seweta jûyena kurdan gureyeno û bedel dano.
Esas gune pêro kurdî jê kurdanê Bakurî hereket bikerê. Mordemî ke Rojava de niyada vîneno ke hometa dîna lewê kurdan niya, nêwazena jû Kurdîstano xoser û serbest bibo. Gorê mi, yardimê Amerîka, Nato û dugelanê jê Qatar, Suudî Erebîstanî û Tirkiye ke nêbo, rêxistina terorîsta îslamî jê DAÎŞ verva Şoreşê Rojavayî jû roze damîs nêbena. Nînan Kobanê xorê kerdo hedef. Wazenê Şoreşê Rojavayî ke kotî dest kerd ci, o ca de bixeneknê.