Hemsereka Komunê Şehîd Kamuranî Hedîya Ramoya ke 3 lajê aye beşdarê YPGyî bîyî, derheqê serrgêra 6. ya Şorişê Rojawanî de qisey kerde. Hedîye Ramoye dîyar kerde ke ê do heta peynî pey domananê xo bibî û wina dewam kerde: “Şorişê Rojawanî keda 7 serreyî nê, netîceyê keda 40 serran o.” AXÎN TOLHILDAN/BAHOZ DAG ANF/QAMIŞLO Hemsereka Komunê Şehîd Kamuranî Hedîya Ramo serra 1994-95î de Têkoşînê Azadîya Kurdî şinasnayo. Hedîya Ramo dima ra Rayberê Şarê Kurdî Abdullah Ocalanî vînena û 2 reyî zîndananê rejîmê Baasî de manena. Hedîya Ramo ke 3 lajê xo beşdarê YPGyî kerda, derheqê serrgêra 6 ya Şorişê Rojawanî de qisey kerde. Ramoye dîyar kerde ke ê verê cû cahîl bîy û o wext cinîyan ser o zext û tedayî zaf bî û wina domnaye: “Endamê partîyanê bînan ameyêne keyeyê ma û ma tena xizmetê înan kerdêne. Mi nameyê Apocîyan endamanê PDKyî ra eşnawitbi. Labelê mi nêzanayêne kam bî. Her ke ma fikrê Rayberê Şarê Kurdî Abdullah Ocalanî şinasna, ma rayîrê ci de aver şîyî. Rejîmî ma ser o zaf zextî kerdênê.” Hedîya Ramoye daye zanayene ke serra 99î de hêzê rejîmî banê mi û yê waya mi bi îdîaya ‘şima Apocî yî, terorîst î’ rijnayî û wina va: “Mi banê xo seba ke perwerde bivînî, teslîmê gerîlayan kerd. Mi, dayîke û wayê mi înan rê werd viraştêne. Ma êdî êdî nasnameyê kurd û cinîye şinasnayêne.” ‘Înşalla beno Egîdêk’ Ramoye qala dîyayîşê Ocalanî zî kerde û wina va: “O wext Şehîde Sakîne Cansize zî newe zîndan ra vejîyaybî û îşkenceyan ver birîndar bîye. Wexto ke Rayberîye ameye, ma zaf heyecanin bî. Rayberîye destê xo da sereyê lajê mi Egîdî ro û nameyê Egîdî pers kerd. Mi zî va, nameyê ci Egîd o. O wext Rayberîye va, înşala beno Egîdêk. Egîd nêweş bi û Rayberîye ey erşawite tedawîye. Dima ra Rayberîye heta serê sibayî ma reyde qisey kerde.” Şorişê ma bi kedê zaf girdî aver şîyî Ramoye va ‘wexto ke Şehîd Xebat Dêrik ame keyeyê ma, ma fam kerd ke do şoriş bibo’ û wina dewam kerde: “Cok ra ma heme perwerde dî. Tena domanê ma nê, xeylê ciwanê bînî beşdarê YPGyî bîyî. Xeylê fermandarî şehîd kewtî. Şoriş bi kedêka zaf girde aver şîyêne. Ma zî şerwanan rê werd viraştêne û berdêne taburê înan. Şerwanê YPG û YPJyî domanê ma yî. Lajê mi Egîdo ke Rayberîye vatbi ‘înşalla rojêkê beno Egîdêk’ ewro bîyo fermandarê YPGyî. Ez lajê xo û heme ciwanan ra îftîxar kena. Verê cû qet pere çinêbi û nêşênayêne cil û gule biherînî. Çeteyî bi hawayo giran hêriş kerdêne.” Ma do pey domananê xo de vinderî Ramoye peynîya qiseykerdişê xo de wina va: “Wexto ke ma dî ke domanê ma sîleh girewtî û erdê xo pawit, ma zaf kêfweş bîyî. Ma zî soz da ke ma do pey domananê xo de vinderî. Ma heta nika sîlehê ma destê ma de û ma sozê xo dibare kenî. Ti kesî bawer nêkerdêne ke do artêşa cinîye û sîlehin awan bibî, labelê nika mumkin bi. Ma verê cû bi hawayo nimite rojbîyayîş û 15ê Tebaxe pîroz kerdêne. Ma ewro serkewtî û ma nêyî bi keda doman û Rayberîya xo kerd.”