Şorişê Rojawanî ke 19ê Temmuza 2012î ra nata game bi game ver bi peynîye şono, Şorişê Rojawanî bi hêvîya heme dinya serrgêra 6. de bêmabên dewam keno. Heta nika bi deshezaran kesî no oxir de canê xo da. Babete ser o xeylê dezgeyan îzehet dayî û serrgêra şorişî pîroz kerdî. Dezgeyan dîyar kerd ke ti hêz nêşêna vernîya awanbîyayîşê şorişî bigîro. Ewro serrgêra 6. ya Şorişê Rojawanî yê 19ê Temmuze yo. Seke yeno zanayene 19ê Temmuza 2012î de Rojawan de bingeyê şorişêkî ame eştene û o wext ra nata game bi game ver bi peynîye şono. Her cayê dinya ra kesî beşdarê nê têkoşînî bîyî û her yewê înan netîcegirewtişî de rolêko esasî girewt. Kongreya Komelê Demokratîke (KCD) û Fermandarîya Pêroyî ya YPJyî derheqê serrgêra 6. ya Şorişê Rojawanî de îzehetê nuştekî dayî. KCDyî dîyar kerd ke sey her serre serrgêra 6. ya Şorişê Rojawanî bi moral, heyecan û coşêko gird yena pîroz kerdene û wina domnayo: “Ma sey KCDyî Şorişê Rojawanî seba şarê xo yê Rojawanî û heme şaranê Rojehalatê Mîyanênî rê pîroz kenî.” KCDyî îzehetê xo de dayo zanayene ke Şorişê Rojawanî ke bi rayberîya cinîye de aver şi, bi destana tewr gird ya merdimîye û wina dewam kerdo: “No şoriş heme averşîyayîş û erjan bi îrade, rêxistinî û hêzê cewherî yê şarî veto raste. Şorişê Rojawanî vera modernîteya kapîtalîstî de bîyo alternatîfê cuya azade ya şaranê Rojhelatê Mîyanênî. Şorişê Rojawanî eynî wextî de bîyo teminatê aştîye, edalet, seyyewbînanî û biratîye.” KCDyî îzehetê xo de qala hêrişê ke vera Şorişê Rojawanî de bîyî kerd û wina va: “Seba ke Şorişê Rojawanî sere de şaranê Kurdistan û Sûrîye rê û heme şaranê Rojhelatê Mîyanênî rê bîyo model, hêzê kehenperestî yê dagîrkerî şorişî sey tehdît dîyî û çeteyanê DAIŞî eştî dewre. Badê ke Kobanê, Minbic û Reqqa ameyî azad kerdene, vera hêzanê dagîrkerîye de serkewtiş ame qezenç kerdene. No serkewtiş tena yê kurdan nê, serkewtişê heme şaran û merdimîye yo. Wayîrvejîyayîşê Şorişê Rojawanî wayîrvejîyayîşê demokrasî û azadîye yo. Ma na çarçewa de yewna rey serrgêra 6. ya Şorişê Rojawanî pîroz kenî û şarê xo yê welatperwer, şerwananê enternasyonal û heme hêzanê demokrasî rê sipasîyê xo kenî. Ma heme şehîdanê xo bi minnet û rêzgirewtişî vîr anî.” Heme cinîyan rê bi hêvîyeFermandarîya Pêroyî ya Yewîya Pawitişê Cinîyan (YPJ) zî no derheq de îzehet daye û serrgêra 6. ya Şorişê Rojawanî pîroz kerde. YPJyî dîyar kerd ke Şorişê Rojawanî şorişêkê cinîyan o û wina va: “Wa Şorişê Rojawanî şexsê Warşîn, Jîyan, Jînda, Xebat, Devrîm, Seydo, Helîne, Ronahî, Zozane, Avêsta, Barîne û sewbîna de heme şehîdan rê pîroz bo. Têkoşînê cinîya ke bi Besê, Zarîfe, Bêrîvane û Sarayan dest pêkerd, bi têkoşînê Nalîne, Şervîne, Rêvane û Avêstayan dewam keno. Cinîyan nîşanê heme dinya da ke ê eşkenî bi her hawayî têkoşîn bidî û xo bipawî. Hêzê Mîyanneteweyî hewl dayî bi çeteyanê DAIŞî Şorişê Rojawanî bifetisnî. Labelê ti hêz nêşêna vernîya têkoşînî bigîro. Ma zî soz danî ke ma do şarê xo reyde têkoşîn bidî.” MERKEZÊ XEBERAN