Vera tecrîdo ke Rayberê Şarê Kurdî Abdullah Ocalanî ser o yeno domnayene de çalakîyî dewam kenî. Sere de Ewropa û xeylê cayanê bînan de çalakîyê şermizarkerdişê tecrîdî dewam kenî.
Ewropa de welatanê Almanya, Hollanda, Swîsre û sewbîna cayan de, reyna Stenbol de çalakîyî ameyî viraştene. Bajarê Frankfurtî yê Almanya de rayberîya Meclîsê Cinîyan ê Sara û Nujîne de çalakîyêk ameye organîzekerdene. Çalakwanan derheqê tecrîdî û grevê vêşanîye de xeylî vilawekî vila kerdî û bêvengîya Ewropa şermezar kerde. Bajarê Muhînî de zî bi çalakîyêk paştî dîyaye xoverdayîşê grevê vêşanîye û rojeyê mergî. Çalakîya ke Komunê Cinîyan ê Sara organîze kerde xeylî kesî tewrê ci bîyî.
Bajarê Den Haagî yê Hollanda de zî kurdistanijî û dostê înan kuçeyan de bî. Platformê Vera Tecrîdî de Cuye vernîya parlamentoyê Hollanda de çalakîyêk organîze kerde. Çalakwanan derheqê rewşa xoverdayoxan de zanayîş da û waşt ke wa dezgehê Ewropa wezîfeyê xo bica bîyarê. Swîsre de zî xeylê bajaran de çalakîyî ameyî viraştene.
Stenbol de tecrîd ame protestokerdene
Xeylê qezayanê Stenbolî de zî çalakîyê şermezarkerdişî ameyî viraştene. Umranîye de xeylê kesî ameyî têhet û yelegê ke fotografê Leyla Guvena ke 191 rojî yo grevê vêşanîye de ya dayî xora û destê yewbînan girewtî û rêzila merdiman viraşt. Çalakgeran bi sloganan xoverdayîşê grevê vêşanîye silam kerd û waşt ke wa tecrîd bêro wedarnayene. Kartal de zî bi heman waştişî rayraşîyayîşêk ame viraştene. Çalakwanan bi siloganê, ‘Veng bidê Leyla’ bale ante xoverdayîşê grevê vêşanîye ser. Beyoglu û Beykoz de zî fîtar ra dima xeylê kesî ameyî têhet rayraşîyayîşê meşaleyinî organîze kerdî.
MERKEZÊ XEBERAN