Nî rozanê peyenan de tayê rojnamevanê tirkî mesela kurdî de stratejiyo newe yê hukumatê tirkî ra qesey kene. Rojnamenvanan Lale Kemal û Fîkret Bîla na îddîa este werte. Ya caye ra cirê zurê ruşniya, ya zî nînan xeyalê xo nusnayî.
Mesela stratejiyo newe niyo, mesela stratejiyê kanî hebena avê berdena. Stratejiyê Çîllerî beno hîra, beno xirt. Hetê hukumatî ra na derheq de çiyo newe nêvajiya. Qeseykerdoxê AKaPe Huseyîn Çelîk bi xo vat: Stratejiyo newe çîno, dewlete hata nika ke se kerdo, hen devam kena.
Kotî ra eskerawo ke derheqê mesela kurdî de stratejiyode newe çîno.
Hukumatê AKaPe Kurdîstan de herb berz nêkerd? Heya!
Her cayê Kurdîstanî de herb esto? Heya!
Her roz însanê kurdî nênê kistene? Heya!
Her roz bi desan însanê kurdî nêcerînê zerre? Heya!
Rîwalê bimbarekkerdena Newroze ra serokê belediya nêcerînê zerre? Heya!
Recep Tayyîp Erdoğanî polîsê xo yo ke girmike dê Ahmet Turk ro bimbarek nêkerd? Heya!
Nêvanê PKK û qomê kurdî gune cerabê, hurdemena aynî niyê? Heya!
Rojnama Ozgur Gundemî nêdê guretene, dima onca no qerar peyser nêont? Heya!
Bi hezaran siyasetvanê kurdî hepisxanan derê? Heya!
Hata 100 rojnamevanê kurdî hepisxanan derê? Heya!
Hepisxanan de domonanê kurdî rê tecawiz nêbeno û nî domonî malbatanê xora dûrî surgin nêbenê? Heya!
Emser Newroze qedexe nêkerde? Heya!
Na lîste şîkîme hona derg kerîme. Endî serrê 90 peyde mendî. Hetê waxtî ra nêvan, hete 3 qat biyayena zulm û zorvajiya hukumatê AKaPe ra van. Hukumat û dewleta AKaPe pêro hukumatanê bînan ra 3 qatî zorvaz yê.
No hukumat wazeno mesela kurdî onca ebi tertele û zulm hata demê halbikero û xanê dewleta tirkî ebi jû tertelode bîn dewlemend kero.
Merevê siyasetê tirkî de faşîzm ra qederî çiyode newe çîno. Onca ebi kstene wazenê gorê xo mesela halbikerê. Erdoğan û cunta xo domonanê xorê jû tertelo bîn mêres verdanê.
Siyasetvan û zaf rojnamevanî tirkî vanê ‘kurdî kewtê binê hukmê teqetanê teverî, verva Tirkiya danê pêro.’
Pekî no kam o dugele bi dugele zugir keno, seweta tertelê Kurdan cira yardim wazeno û ceno?
Predatorî û Heronî kamî rê û kotî ra yenê?!
Stratejî kan, vatîs kan.
Hatake na mesela raştke halnêbiye, ez qeyta jû vatîs rê îman nêken.