Xeylê taxê qezaya Sûrî ya tarîxî ya Amedî hetê dewlete ra ameybî rijnayene û bi hezaran merdimî ca û warê xo ra ameyî koçber kerdene. Taxê ke ameyî rijnayene de nika banê ecêbî ke qet eleqeya xo tarîxê Sûrî reyde çin î, yenî viraştene. Tayê cayan de zî tay banî hîna nêameyî rijnayene, labelê rijnayîşanê bînan ver, xeylê zirar dîyî.
Taxa Alîpaşa ke qet tede pêrodayîş nêqewimîyabi zî xezebê îqtîdarî ra nêxelisîya û zafaneyê banê na taxe zî ameyî rijnayene. Banê ke Alîpaşa de mendî zî zaf zirar dîyî. Bi ameyîşê zimistanî, taxijî dest bi temîrkerdişê banê xo kerdî. Kesê ke taxe de ronîşenî, dîyar kenî ke rijîyayîşan ver banê înan zirar dîyo û ê seba ke zimistanî serd û pûke nêbo, bananê xo temîr kenî.
AMED