Sebrê ma reseno peynî
Qezaya Amed Sûr de welatijî 87 rojiyo vera ablûqe û êrişanê leymin yê dewleta Tirk xover danê. Mavêna qûwetanê pawitenê sivîl û çeteyanê AKP de pirodayişî ramenê. Heto bîn ra 200 welatijê sivîl bodrimanê keyeyan de mexsûr mendê û zey Cizîr bi înfazkerdiş ra rî bi rî yê. KCD, DBP, HDP û KJA vizêr vengdayişa piyayî day û waştî ke verniya qetlîama newî bîro giroten. Hemserokê KCD Hatîp Dîcle da zonayen ke, roja Şeme seat 13.00î de Koşûyolû de kombiyayişa çapemenî virazenê. Dîcle va, Amed zey Cizîr destûr nêdano qetlîamî. Qiseyê ma ganî zey îqazî bîrê hesibnayen. Dîcle va, wa bizanê ke sebrê ma reseno sînor û aşkere kerd ke ê dê veng bidê Sûr.
Sûr zey Cizîr nêbo
Heto bîn ra sûkanê rojawanê Tirkîya ra zî pawitoxê heqê merdimî dûştê polîtîkayê qirkerdişî yê dewlete kewtî hereket. Pawitoxê heqê merdimî Zeynep Ceren Boztoprak û Zuleyha Gulum veng dayî pêroyîya Tirkîya û vatî ke wa Sûr de zî zey Cizîr qirkerdişêk nîro cuyayîş. Seroka ÎHD yê Stenbol’ê Zeynep Ceren Boztoprak vat ke dewleta tirk û AKP bi hembarî peynîya weçînayîşê 7’ê Hezîrane de qirkerdişan viraştî û heqê merdimî zî çinî kerdî û wina vat: “Nika Kurdistan de qirkerdiş û hêrişî ke yenî kerdiş, serranê ‘90’î ra hîna xirabî yê. Dewlet no şerî de sifte heqê cuwye û heme heqê merdimî îxlal kerd. Nika Tirkîya de hiqûq ameyo têkberdiş. Xora mekanîzmayê hiqûqî yê mîyanî têk şîbî nika mekanîzmayê hiqûqî yê teberî zî têk berdî. Ewro sifte MHMA (AÎHM), YN û YE dûştê na qirkerdişî bêveng î.”
Muzakere şert o
Azayê Blokê Aştî û pwt. Zuleyha Gulum zî destnîşan kerd ke nika bi aşkera şerêko yeno cuyayîş û wina dewam kerd: “Çi heyf ke no şer de raybazê şerî zî nînê şuxilnayîş. Kam nika aştî biwazo bi lezî xayîn yeno nîşandayîş. AKP nika hem Kurdistan hem zî Sûrîye de konseptê şerî vista dewreyî. DHME zî qet seba heqê merdimî cigêrayîşêk nêkena. Hewna Mahkemeya Makeqanûnî zî bêvengîya xo domnena. No şer de çi heyf ke dewletê mîyanêneteweyî menfaetê xo esas gênî û no ser zî girêdeyeya hiqûqî ser çik nêkenî.” Zuleyha Gulum eleqe ant korîdoro cuwya ser û wina va: “Ganî Sûr de seba welatijê sivîl, korîdorê cuwye bêro akerdiş û operasyonî zî bi lezî bêrê vindernayîş. AKP, Sûrîye de fek şerî ra û Kurdistan de zî polîtîkayê lêminî ra fek verabida. Bi lezî muzakereyî destpa bikerî û no ser ma veng danî pêroyîya Tirkîya”.
JINHA/STENBOL