Rêxistinê Suryanîyan yê Swêdî û komeleyan vera Walîtîya Mêrdînî ke dest ronaybî arazîyê suryanîyan ser reaksîyon nawitî û seba tepîyagirewtişê erdanê xo amadekarîya awankerdişê komîteyêk kenî. Yewîya Dêranê Suryanîyan ya Îskandînavya dîyar kerdî ke do vera destronayîşê erdan ser de bêveng nêmanî û heta ke erdê înan peyser nêdî dayîş ê do têkoşîn bidî.
Parlementerê Partîya Lîberalan Robert Hannah reya 3, Parlementerê Partîya Karkerê Demokratîk Yilmaz Kerîmo û Parlementerê Partîya Hirîstîyanê Demokratîke Robert Halefî babete berdî meclîsê Swêdî.Babete ser o Serekê Yewîya Dêrê Suryanîyan yê Îskandînavya Aydin Zette Chelayî qisey kerd.
Ma do destûr nêdî, ma do bêveng nêmanî
Chelayî qiseykerdişê xo de wina va: “Ma Qerarê Walîtîya Mêrdînî ra dima îdarekaran reyde pêvînayîşan kerd û înan ra eştişê gamêkî taleb kerd. Nika ra çend rojî verê Walîtîya Mîdyatî suryanîyan ra vato ‘ma nê erdan şima rê bidê kîra’. Walîtî erdê kamî dano kam? Huqûq û edalet nêmendo. Çîyêko yeno kerdiş eyb o. Eke AKP gamêk nêerzo ma do şêrî Mehkemeya Heqê Merdiman yê Ewropa (AÎHM). Êdî kardî ginaya este. Ma do bêveng nêmanî. Bi înkarkerdişan çem nêreseno cayêk. Tewr peynî dest ronayî erdê ma ser de zî. Erdê ma namûs û ganê ma yî. Ma do destur nêdî nêyî.”