Yeno zanayîş Walîtîya Mêrdînî verê cû 50 kîlîse, manastir û mezelê ke aydê suryanîyan bîy, xesp kerdbîye û dewrê Dîyanet û Xezneye kerdbîye. No xespkerdiş bîbî sebebê reaksîyonanê suryanîyan.
Rêxistinê asurî û suryanîyan Serekkomar Recep Tayyîp Erdogan, Serekwezîr Bînalî Yildirim û Wezîrê Malîye yê Tirkîya Mehmet Şîmşekî rê mektubêk erşawitî û bi na mektube 50 milkê ke hetê AKPyî ra ameybî xespkerdiş, waştîy.
Rêxistinê ke mîyanê înan de Yewîya Kîlîseyanê Suryanîyan yê Îskandînavya, Konseyê Şarê Suryanî, Asurî û Keldanî, Federasyonê Turabdînî, Yewîya Demokratîke ya Suryanîyan, Rêxistina Demokratîke ya Asurîyan, Partîya Azadîye ya Mezopotamya û Federasyonê Suryanîyî Swêdî zî tede yî, mektube de waştî ke kîlîse, manastir, mezel û sewbîna çîyê ke dest ronîyayî ser, wa dewrê înan bêrî kerdiş.
Metube de wina ameyo vatiş:“Ma şaranê tewr qedîm yê Mezopotamya ra yî û ma şaristanîyanê tewr girdan awan kerdî. Labelê dima ra hêriş û zextan ver ma mecbûr mendîy ke erdê xo biteriknîy. Wexto ke erdê ma dewrê wezîrîye bîye, ti temsîlkarê ma ewja de nêbîy û xebere nêdîyaya weqfanê ma. Xespkerdişê milkê ma yeno manaya îxlalê heq û azadîyan.”
Ma do heta bigîrî, dewam bikerî
Heyetêk zî ser nameyê rêxistin û kîlîseyanê suryanîyan Sefîrê tirk Kaya Turkmenî zîyaret kerd û waştişê suryanîyan sefîrî ra va. Saît Yildizo ke heyetî mîyan de ca girewtêne va ‘heta ke milkê suryanîyan bêrî teslîmkerdiş, hewldayîşê ma do bidomîyo.’
Suleyman Boyaciyo ke mîyanê Partîya Azadîye ya Mezopotamya de ca gêno zî dîyar kerd ke ê nê xespî sey bi hawayo fîzîkî şaranê cîya-cîyayan Anatolîa ra wedarnayîş vînenî.
MURAT KUSEYRÎ /STOCKHOLM/ANF