Komîsyonê Ziwan û Perwerde yê KCD bernameyê çalakî û aktivîteyanê 15ê Gulane Roşanê Ziwanê Kurdî aşkere kerd.
15ê Gulane Roşanê Ziwanê Kurdî rê çend rojê peynî mendî. Komîsyonê Ziwan û Perwerde yê KCD derheqê roşanî de kombîyayişê çapemenî viraşt û bernameyê nûmayiş û aktivîteyan aşkere kerd. Salona kombiyayiş de dowîzê zey ‘ziwaneke azad, cuwyanek azad” aliqyayî. Azayê KURDÎ-DER û yê Komîsyonê Ziwan û Perwerde yê KCD tewrê kombiyayiş bî.
Şar wayrê zonê xo vejyena
Sekreterê KURDÎ-DER Nurî Erdogan’î vist vîrî ke tarîxê seserrî yê Tirkîye, tarîxê înkar, îmha û asîmîlasyonî yo. Erdogan’î aşkere kerd ke, Komar sifte ra projeyê ‘jû dewlet, jû al, jew ziwan, jû mîlet’ ser şaran de zey zext û çinîkerdişî ferz kerd.
Sekreterê KURDÎ-DER’î da zonayen ke, serva jû civakî ziwan nêbo nêbeno yo û wina va: “Ziwan kamîya civakî yo. Çinî hesibnayişê ziwanê jû civakî, çinîhesibnayişê kamîya cîya. Vera ziwanê şarê kurd polîtîkayê înkar, îmha, asîmîlasyon, zext û şîdetî ramenê. La vera nê polîtîkayan şarê ma zî xover dano. Şarê ma serva cuwyayişê zonê xo ke netîceyê emeg û tekoşînê gird de vet werte dano xover.”
‘Wayrê hard û ziwanê xo vejyeno’
Erdogan’î da zonayen ke şarê Kurdistan serva ke bi raybazanê zanyarî û modern ziwan û kulturê xo bidê cuwyayiş xoverdayişê xo kenê hera, serva înşakerdişê civakî zereyê hewldayenan de yê û vist vîrî ke kurdî azadîya ziwanê may zey garantîyê azadîya neteweyî vînenê.
Bernameyê nûmayişan:
* 10ê Gulan seat 13.00’î de Postexaneyê Amed Ofîs ra serva tepişteyan qertî yenê rusnayen. Seat 15.00’î de Salona Tîyatro yê Şaredarîya Sûka Gird yê Amed de damusnayîşê kaya “Masîreşka Biçûk”.
* 13ê Gulane seat 15.00’î de serva doman (qeçek) aktivîteyê, ronayişê dar, boyekerdişê rî û aktivîteyê bi palyaço û erbane virazîyenê. Seat 15.00’î de Sumerpark de kayê bi domanan, xêzkerdişê resîm, seat 16.00’î de Parqa Rojawa de aktivîteyê defîleyê vûrnayiş yê domanan, seat 17.30’î de Kuçeyê Sanat’î de hetê Koroyê Cenîyan yê Sûr û Navendê Kultûr yê Dîcle Firat goşdarîkerdişê muzîk. Seat 19.30’î de Kuçeyê Sanat’î de goşdarîkerdişê muzîk yê Rênas Pîro û Navendê Kultûr yê Dîcle Firat’î.
* 14ê Gulane seat 13.00’î de Salona Tîyatro yê Şaredarîya Sûka Pîl yê Amed’î de panelê ‘ziwan û edebîyata kurdî’ virazîyena. Parlamenterê HDP yê Sêrt Kadrî Yildirim ra pîya Zeynep Yaş, Dîlaver Zeraq û nesrîn Şanli tewrê panel benê. Seat 13.00’î de Parkorman de vilakerdişê istanikê (sanik) kurdî û pirtûkî. Seat 14.00’î de Taxa Îskenderpaşa de aktivîteyê kuçe, seat 15.00’î de Sumerpark de atolyeyê ‘bi ziwanê may de heqê domanan’, serva domanan dersê bi kurmancî û dimilî, seat 17.00’î de Salona Sînema yê Sumerpark de damusnayişê filîmê „Navê te çi ye?” Seat 17.00’î de aktivîteyê goşdarîkerdişê dengbêjan.
* 15ê Gulane seat 10.00’î de Devgeçîdî de vadayişê firokan, seat 13.00’î de Mektebê Alî Erel de damustayinê çapemenî û rayşiyayiş. Seat 19.00’î de Parkorman’î de aktivîteyê muzîkal yê hunermendê Aram Tigran Zele Mele.
DÎHA/AMED