AZAD ARARAT
Fîlozof Zerdeştî ra nata, fina yewine, tarîxê ma de yew fîlozofo bîne zêdîya. O zî Rayber Abdullah Ocalan o. Fîlozofîya ci seba ke şayo cuya kurdan bi vurno ra yena. O yew îdeolog o. Seba ke teorîya azadîye û demokrasî aver vist. Teorîya şer aver vist. Teorîya raxelisnayîşê cinsê cinîyan raver vist. Teorîya raxelisnayîşê xoza aver vist. Seba şaran yew pergalo newe aver vist. Coka Abdullah Ocalan yew fîlozof û îdeolog o. Abdullah Ocalan tena fîlozof û îdeolog nîyo. O pratîsyenêko zaf bi hêz o. Coka o beno Rayberê şarê xo zî. Ez bi xo bîya şahid ke Raybertî hem hetê vîr ra hem zî hetê cuye ra şekil dano komelî. Peynîye de yew keso/a newe ano raste.
15ê tebaxe pratîzekerdişê nê fîlozof, îdeolog û rayberîya Abdullah Ocalanî yo. 15ê tebaxe girîngîya xo na rastîye ra gêna. Kurdan bi seserran dagîrkeran rê leşkerîye kerd. Labelê fina yewine kurdan seba xo û vera dagîrkeran de dest bi şer kerd û gama yewine de ser kewtî. Naye seba ma kurdan zaf girîng a. Bi na game binyatê gerîlatîye ronîya. Na game ra tepîya komelê kurdan mîyan de çi raverşîyîş esto se verê koyan ser de gerîlayan mîyan de ameyo raver vistene. Yan zî rasterast (dîrek) têkîlîya xo bi gerîlatîye ra esto. Gerîla pratîsyenê îdolojîya Rayber Abdullah Ocalanî ya. Tayinan heqê Sezar nêdanê ci la wa bo. Ma zanenê ke înan nîyet de pak nîyê.
Roja ewroyine de zî yan rasterast yan zî ne rasterast heme raverşîyayîşî bi pratîka gerîla ya bestaye ya. Eke şervanî û pêşmerge estê; nînan saya estbîyena gerîlayan estê. Eke Başûrê Kurdistanî de statûya kurdan esta, saya gerîlatîya PKK esta. Eke çend serrî yo, Rojawanê Kurdistanî de yew pergala newîye raver kewena û bi şorişgêrîya xo xo îspat kena se, na zî fina gerîlatîya PKK ra bestaye ya. Eke heme dinya de, keyepel, kovare, û rojnameyan de fotografanê şervananê cinîyan neşir benê se, naye se ra se gerîlatîya ke 33 serrî yo Koyanê Kurdistanî de xover dano ra bestaye yo. Eke Rayber Abdullah Ocalanî analîzanê xo yê cinsê cinî û camêrdan ser o nêkerdêne û şexsiyeto sosyalîst û komunalîst raver nêvistayêne kam kêneka kurdî şayê Koyanê Kurdistanî de û bajaranê DAÎŞî de şer bikero! Înkarkerdiş kesî keno heramzade. Qanqê cû ganî heqê Sezarî bêro dayîş û keda Raybertî û yê bi hezaran gerîlayanê şehîd û gazîyan bêro dayene. Nê raverşîyayîşanê peynî têkoşînê gerîla yê 33 serran ser o benê. La rewşa ewroyin ya kurdan tarîx ra ciya girewtena dest, yan nêzanîyeya yan zî yew kaya yena kerdene ya.
Seba kurdan gerîlatî bîyayîş o. Xo azadkerdiş o. Kulturê xo raver vistiş o. Bi hezaran ciwanê kurdî ke sey nêzan, apey de mende, şiwan û gawan ameyêne dîyene; gerîlatî mîyan de bîy fermandar, sîyasetmedar, tîyatro viraştêne, filîm antêne, roman û şîîrî nuştêne, têkîlîyê komelî û aîleya demokratîke raver vistêne. Coka merdim çiqas qala 15ê Tebaxe û gerîlatî bikero zî qîm nêkeno. Seba ciwananê ma unîversîte, dîploma, amoyoxa azad ra bigê hema heme çî gerîla mîyan de ya. Coka wa ciwanî bêrê beşdarê na cuya newîyê bibê. Qet nêbo wa verê xo biçarnê ci û mirdîya xo ci ra biwerê û bişimê. Ma do heta serrgêra bîne xeylê gamanê newîyan çekerê. Kamî tede cayê xo girewt ê do serfîraz bicuyê.