Operasyonê xelesnayîşê Tebqa ke 21'ê Adare de destpa kerd resya netîce. Sûk çeteyanê DAIŞ ra xelesnîya. Verfeka Odeyê Çalakîya Xezeba Firatî Cîhan Şêx Ehmed dîyar kerd ke Tebqa ra dima, nika dor ê Reqa ya.
Quwetanê QSD çarçoveyê hemleya 4. yê operasyona Xezeba Firatî de sûka Tebqa DAIŞ ra kerd pak, û bi nayî gameke bîn nezdîyê Reqa bî. Verfeka Odeyê Çalakîya Xezeba Firatî Cîhan Şêx Ehmed dîyar kerd ke Tebqa ra dima, nika dor ê Reqa ya.
Lejvanê QSD'ê, çarçoveyê hemleya xelesnayîşê Tebqa de, ke 21'ê Adare ra na het ramnenê, merkezê sûka Tebqa, bi temamî çeteyanê DAIŞ ra xelesnay û girotî bin qontrolê xo. Quwetanê QSD 3 rojanê peynî de 9 taxan destê çeteyan ra xelesnay. Netîceyê operasyonî de bi hezaran sivîlî amey xelesnayen, û resnîyay cayanê ewle. Dormeyê awbendê Tebqa de zî pirodayişî ramenê.
Seba DAIŞ qasê Medîne muhîm bi
Tebqa ke kinarê Çemê Firatî de kewna bakurê Sûrîye, 40 kîlometre dûrê Reqa ya. Goreyê texmînan nufûsa sûk 70-80 hezarî ya. Vêşêrê nufûs erebê sûnnî yê. Tebqa 2011 ra na het bin qontrolê komanê çeteyan de yo. Tebqa rayîra bazirganî ya mavêna Sûrîye û sûkanê Iraq Mûsil û Bexda bî. DAIŞ no ca qasê Medîne muhîm dî.
Bi xelesnayîşê Tebqa ra, korîdorê ver bi Heleb seba DAIŞ ame girewten. Herzewbîn raya yardimdayenê lejkerî û lojîstîk yê dewleta Tirk ke dana çeteyan zî amê birnayen.
Verfeka Odeyê Çalakîya Xezeba Firatî Cîhan Şêx Ehmed ke derheqê hemle de qisey kerd, da zonayen ke nika dor ê Reqa ya. Ehmed vengê nêtersê da şarî û DAÎŞî ra zî waşt ke teslîm bibê.
'Teslîm bibê’
Ehmed da zonayen ke cayê ke ê xelesnenê wazenê bivistnê xîzmetê şarî û wina va: “Çeteyanê DAÎŞ her ca kerdê mayîn. Nayî ra cayê ke ma xelesnay de karê cigeyrayîşî ramenê. Tebqa merkezê DAÎŞ bi. Tebqa seba ma cayekê stratejîk a. Bê Tebqa nêşkenê Reqa bigîrê. Tebqa ra dima ma dê ver bi Reqa şirê. Nika sûk de pakîye peynî yenê kerdiş. Şîyayîşê QSD bawerî û omid da şarê herem. Cinî û gencî tewrê QSD benê.”
Cîhan Şêx Ehmed veng da şaranê Reqa ke ver bi herêmanê înan şirê. Ehmed da zonayen ke ê dê hinî destûr nêdê ke şar dejî bianco. Tewr peynî de zî Ehmed veng da çeteyanê DAIŞ ke tifinganê xo viradê û teslîmê quwetanê QSD bibê û aşkere kerd ke xeynê teslîmbîyayîşî xelesnayîşê çeteyan çin o.
NAZIM DAŞTAN/DÎHABER/REQA