BÎLAL SEÇKÎN / MA / STENBOL
Rayberê Şarê Kurd Abdullah Ocalan 15ê Sibata 1999î ra nata Zîndanê Îmrali de maneno û o tarîx ra nata binê tecrîdî de yo. Bitaybetî 2011 ra nata tecrîdêko girankerde Îmrali de yeno bicaardiş. 1 serrî ra zêdeyêr o ke Îmrali ra ti xebere nîna girewtiş.
Babete ser o Sereka Pêroyîya ANAPî ya kehene Prof. Dr. Nesrîn Nase qisey kerde. Nase va ‘Ocalan pêvînayîşanê aştîye de rolêko muhîm kay kerd’ û wina va: “Bitaybetî xerîtaya ke hetê Ocalanî ra ameybî amadekerdiş, seba pêvînayîşan bitesîr û dîyarker bîye.”
Nase dewamê qiseykerdişê xo de dîyar kerde ke heta ke problemê kurdî çareser nêbo, Tirkîya aver nêşona û wina va: “Çîyêko winasî mumkin nîyo. Demokratîkbîyayîşê Tirkîya, bîyayîşê dewleta huqûqî û têkilîya ke bi dinya reyde yena ronayîş heme no problem reyde eleqeder î. Cok ra ganî ma no mesele bi hawayo cîddî bigîrî dest. Badê ke Ocalan teslîmê Tirkîya ame kerdiş, problemê kurd açarîya sewbîna yew hewa.”
Dewlete tecrîdî şuxilnena
Nase qala nizdîbîyayîşê dewlete zî kerde û wina va: “Dewlete tecrîdî sey haletî şuxilnena. Goreyê xo ge-ge şidênena, ge-ge zî sist kena. Ewro bi hezaran kesî rayberê xo meraq kenî û wazenî tira xeberêk bigîrî. Ser keso ke winasî de domnayîşê tecrîdî mîyanê her di hetan de bêbawerîye zêdeneno. Ma bi hawayo baş zanî ke ser şarê kurdî de tesîrê Ocalanî zaf o. Cok ra eke aştîye biameyêne rojeve, o wext do cîya bibîyêne.”
Nase peynîya qiseykerdişê xo de wina va: “Ez prosesêko wina zehmet de seba Tirkîya etirîyena. Heta ke herême de problemî bi hawayo aştîye çareser nêbî, netîce do giran bibo. Ma ancax bi aştîye eşkenî xo nêyî ra bixelisnî. Rayîrê nêyî zî ancax bi pêameyîşê kurdan reyde û welatîbîyayîşêkê seypê mumkin o.”