Avûkatê Rayberê Şarê Kurdî Abdullah Ocalanî, qerarê qedexeyê ‘pêvînayîş, heqê telefonî û pêvînayîşê avûkatî’ kirişt Mehkemeya AYM. Metnê muracatî yê avûkatan de ca dîyayo bêhuqûqîya nê qerarî ser û ameyo vatene ke no qerar nîno qebul kerdene. Heto bîn ra Çalakîya Nobeta Azadîye zî hewteyo 315. de dewam kena.

Bi waştişê Serdozgerîya Komare ya Bursa Hakimîya Înfazî ya 1. ya Bursa derheqê Rayberê Şarê Kurdî Abdullah Ocalan û hepsîyê bînî Hamîlî Yildirim, Omer Hayrî Konar û Veysî Aktaşî de qerarê qedexeyê ‘pêvînayîş, telekomînîkasyono nuştekî, heqê telefonî û pêvînayîşê avûkatî’ girewte û qedexe hetê Mehkemeya Cezaya Girane ya 1. ya Bursa ra ame tesdîq kerdene.

Avûkatan dosya kirişte Mehkemeya Qanûno Bingeyî (AYM). Goreyê muracatê avûkatan Ocalan 6 serrî 10 aşmî yo, hepsîyê bînî roja ke neqlê Zîndanê Îmrali bîyî ra nata 3 serrî 2 aşmî yo ke pêvînayîşê înan yê avûkatî hetê Serdozgerîya Komare ya Bursa ra ameyo red kerdene.

Avûkatan metnê muracatî de dîyar kerdo ke heqê mîyanneteweyî yê Heqê Merdiman yê Ewropa û Qanûno Bingeyî (AÎHS) ameyo îxlal kerdene û wina dewam kerdo. “No qerar û kerdiş hetê huqûqî ra nîno qebul kerdene. Heta nika zîyaretê keyeyan de ti delîl û belgeyê teberê huqûqî de nêameyo dîyayene. Ti qanûn de ca nêdîyayo astengkerdişê pêvînayîşê avûkatan. Herçiqas ke wina yo labelê reyna zî pêvînayîş ameyo qedexekerdiş û no teberê huqûqî de yo. Cezayê dîsîplînî ke qala înan yena kerdene, heme zî cezayê ke mabênê serranê 2005 û 2009î de ameyî girewtene yî. Her ke şono çîyê ke teberê huqûqî de yî zêde benî. Ganî goreyê qerarê AÎHM û CPTyî hereket bikerî.

Nobeta Azadîye grûba Kîelî de ya

Heto bîn ra Nobeta Ocalan rê Azadîye ke serra xo ya 7. de vernîya Konseyê Ewropa de dewam kena, her hewte hetê grûbêka cîyaye ra yena dewr girewtene. Na çalakîye hewteyo 315. de hetê grûba ke bajarê Kîelî yê Almanya ra dewr girîya. Grûba nobete de kesê bi nameyê Yucel Akçîçek, Mahmut Haç, Şexmus Mustefa û Egît Şahîn Efrîn ca gênî. Grûbe 800 kîlometre dûrî ra ameye Strasbourg û ser nameyê grûbe îzehetêk dîyaye. Îzehet de ca dîyayo muhîmîya serra 7. ya çalakîya nobete.

Hedefê ma azadîya Rayberê Şarê Kurdî yo

Îzehet de ameyo vatene ke ‘wayîrvejîyayîşê Ocalanî, wayîrvejîyayîşê Kurdistanî yo’ û wina dewam kerdo: “Na çalakîyêka tarîxî ya. Çalakîye do heta azadîye dewam bikero. Ganî bi hawayo lez Ocalan reyde pêvînayîşî bêrî viraştene û no het de etirîyayîşî bêrî wedarnayene. Tîya de hedefê ma azadîya Rayberê Şarê Kurdî yo.”

Seke yeno zanayene çalakîye 25ê Hezîrana 2012î de ameybî dest pêkerdene û çend rojî verê serrgêra çalakîye bîye. Serrgêra çalakîye de hemserekê ke binê banê KCDK-E de ca gênî, seba 5 rojan nobete girewtî. Sere de Hemserekê Kongra-Gelî Remzî Kartal, temsîlkarê dezgeyê sîvîlî û xeylê kesê bînî ca girewtî. Heto bîn ra endamê PYDyî zî çalakîye de ca girewtî.

Heto bîn ra avûkatanê ocalanî seba ke muwekkîlê xo reyde pêvînayîş bikerî reya 768. muracatê Serdozgerîya Komare ya Bursa kerdî. Muracatê keyeyê Ocalanî yê 82. zî ame red kerdene.

 

 MERKEZÊ XEBERAN