Çalakîya grevê vêşanîye ya Leyla Guvene ke seba şermizarkerdişê tecrîdî amebî destpêkerdene, roja 14. de dewam keno. Guvene va ‘AKP mecbûr o ke hesasîyetê kurdan esas bigîro’ û wina dewam kerde: “Neke AKP do şêro. Qet şik çin o ke tecrîd bi vengêko hempar qedîyeno.”
OZGUR PAKSOY / MA / AMED
Hemsereka Kongreya Komelê Demokratîke û Parlamentera HDPyî ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî ser o esto, şermizar bikera, 8ê teşrîna peyêne ra nata grevê vêşanîye de ya. Grevê Guvene roja 14. de dewam keno.
Guvene bi mabênkarîya avûkatan çapemenîye rê qisey kerde. Guvene vato ‘ez bawer kena ke do destekê raya pêroyî her ke şêro zêde bibo’ û wina dewam kerdo: “Sere de kurdî û hetê demokratîkî, dezgehê heqê merdiman heme zanî ke tecrîd sucê merdimîye yo û nîno qebulkerdene. Ez tena eşkena averşîyayîşan rojnameyan ra taqîb bikera. Kanalê ke yenî dayene, heme zî aydê hukmatî yî. Reyna radyo zî FM tena esta.”
Guvene bale ante çalakîyanê verênan ser û wina va: “Tîya de amanc wedarîyayîşê tecrîdî yo û şertê Ocalanî bêrî başkerdene. Cok ra ganî çalakîya mi baş bêro famkerdene û destekkerdene. Ez baş a û weşîya mi zî baş a. Her roje bi hawayo sistematik kontrolê mi yenî kerdene.”
Hezar qatê ci Kurdîstan de benî
Guvene qala qedexebîyayîşê çalakîyan kerde û wina va: “Ez pêhesîyaya ke Walîtîye heme çalakîyî qedexe kerdî. Ez şaş nêbîya. Ganî bêro zanayene ke neheqîyê ke rojawanê Tirkîya de benî, hezar qatê înan Kurdîstan de benî. Her keye ra 2-3 kesî tewqîfbîyaye yî. Colemêrg de 4 birayî tewqîfkerde yî. No seba keyeyêk zaf giran o. Heme ca kerdo zîndan, labelê reyna zî netîceyo ke wazeno nêgirewto. Yeno zanayene, seba astengkerdişê Newroze Kemal Kurkut ame qetilkerdene. Labelê şarî rasteyan reyna zî pirr kerd. No tena nimuneyêk o, hîna zaf nimuneyê bînî estî. Herçiqas ke hende dejî estî zî, kurdî wayîrê erjanê xo vejîyenî. AKP bi nê polîtîkayê ke verê cû ameyî cerebnayene, nêşêno netîce bigîro.”
AKP mecbûr o ke esas bigîro
Guvene peynîya qiseykerdişê xo de nê mesajî dayî hukmatê AKPyî û raya pêroyî: “AKP mecbûr o ke hesasîyetê kurdan esas bigîro. Eke na rewşe wina dewam bikero, o wext do AKP zî sîyaset de şêro. Waştişê mi o yo ke wa eleqederî bi aqlêko hempar na raştîye bivînî û biagêrî polîtîkayanê raştan ser. Wa xizmetê şarî bikerî. Qet şik çin o ke no het de berpirsîyarîye kewena milê hetanê şorişgêran û demokratîkan ser. Vengo hempar yê nê hetan eşkeno tecrîdî biqedêno û xeyalanê hemparan yê şarî pê bîyaro.”