50 sîyasetmedar û temsîlkaranê sazgehanê kurd 5ê Îlone ra tepya Amed de bi waştena Rayverê Şarê Kurd Ocalanî ra xeber girotiş destpa nûmayişê grevê veyşanî kerd. Çormeyê nûmayişkaran de xeleka wayîrvejyayişî her ke şino bena hera. Amed ra pîya xêlê cayan de bi nûmayişan grevê veyşanî rê paşt ame dayen. Dersim ra zî Pîrê alewî û xêlê temsîlkarî şî zîyaretî. 

Nûmayiş roja 6. de rameno û raştê eleqe û paştîdayişê welatijan yeno. Her roj seat 10.00ê sodir ra tepya zîyaretî destpa kenê. Welatijan ra pîya sîyasetmedar, hunerment û temsîlkarê sazgehanê civaka sivîl bi zîyaretan him paştî danê nûmayişkaran, him zî wayîrê waştenanê ci û nûmayişa ci vejyenê. Roja verî zî Mayanê Haştî, temsîlkarê şarê Suryanî, temsîlkarê sazgehanê civaka sivîl ra pîya bi seyan welatijî banê HDP yê sûk de amey têlewe û pêro pîya bi sloganê “Biciwe Serok Apo” heta cayê grevê veyşanî ray şî û nûmayişkaran zîyaret kerdî. Merdîn, Mîdyad û Şirnex ra zî komel û federasyonê şarê Suryanî paştî day nûmayişkaran. Pîrê alewî û xêlê temsîlkarê ke Dersim ra şî zîyaretî nûmayişkaran poştdayenê xo ardî zon. Pîran aşkere kerdî ke heqê her kesî esto ke bi îtiqat û kulturê xo bi azad biciwîyê.


Sebebê bîyayiş û nêbîyayiş o

Welatijê Amed ke derheqê nûmayişî de qisey kerdî vengdayişê wayîrvejyayişê nûmayişî day şarî. Welatijan vistî îr ke Ocalan seba şaranê Kurdistan û Tirkîye sebebê bîyayiş û nêbîyayiş o. 

Wendoxê zangehî Ferhat Orenari vist vîrî ke badê hewldayenê derbe Ocalanî ra xeber nêgirotiş bîya sebebê şik û gumanan û aşkere kerd ke dûştê nayî de damusnayişê nêrazîbîyenî heqekê xozayî yo. Orenari aşkere kerd ke o bi xo Ocalanî zey rayver qebûl keno û wina va: “Nûmayişê grevê veyşanî pêrokîn şarî temsîl keno. Eke ma bi rêxistinî hereket bikerê ma dê netîce bigîrê. Ganî şarê Amed paşt bido nûmayişî. Ganî ma çormeyê nûmayişkaranê grevê veyşanî bigîrê. Ganî şarê kurd  bi aktîf meydanan de bo. Haştî encex bi azadîya Ocalanî ca yena.  Welatijo bi nameyê Enwerî zî waşt ke pêdiyayişê Ocalanî rê destûr bîro dayen û wina va: “Kesê ke grevê veyşanî de ca gênê însanê ma yê. Ganî ma wayîrê însananê xo bivejyê. Rojawayê Tirkîye ma nêwazeno.” Welatij Enes Tûranî zî waşt ke Ocalan ra xeber bîro girotiş û aşkere kerd ke eke Ocalan serbest veradîyo haştî zî yeno hizûr zî. 


Çewlig veng da

Semedê nûmayişê grevê veyşanî jew vengê wayîrvejyayişî zî Çewlig ra ame. Çewlîg de bi rayveriyê HDP,DBP û KJA greva tarîxî ê Amed slûmî bî. Parlamenterê HDP ê Amedî Îdrîs  Baluken tewr xelyek welatijan ver banê DBP ê Çewlîg de amey pêhet û veng day hikûmet ke tecrîdê ser Rayverê Şarê Kurd Abdullah Ocalanî ca de wedarnê. Nûmayişkaran panqarta ‘Ma wahar greva vêşanî ê Amed veciyene û slûm kenî’ aliqnay. Kombiyayîş de Îdrîs Balukenî hikumetê AKP aya kerd û waşte ke tecrîdo ke Rayverê Şarê Kurd Ocalanî ser de ferz kenê  ca de wedariyo. 


Wa kes muzakere mepawo

Baluken eleqa ûnt dişmenê AKP ê ser şarê Kurd ser û vat: “Polîtîkayê AKP ê zerrê û tewrê welat dişmeniyê Kurdan esto. AKP her tulê  xo pê zîhniyê tafsiyekerdişê Kurdan erzena.” Parlementerê HDP ê Amedî Îdrîs Balukenî arde zûne ke hetûn tecrîd dewre de bi wa qe ço (kes) newera muzakere û diyayîşanê haştî mepawo. Baluken dazûneyen ke AKP dişmeniyê xo şarê Kurd re pê tecrîd Îmrali miyejnena ra û hina dewam kerd: “Eke tecrîd dewam bikire, AKP tewer û zerrê de pê na polîtîkayê lejî  şarê Kurd re herîşan re dewam kena. Coka tecrîd nîno qowilkerdiş û semedê wedartişê tecrîde çike ma dest ra biyere ma kene.”

Balukênî hayr ant rol û muhîmînê greva vêşanî ê Amedî ser û vat ê hukumet ra semedê wedartişê tecrîdî gum eştişî pawene. Îdrîs Baluken semedê wahar veciyayîşê Ocalan veng da şarê Çewlîg û waşte ke veciye meydanan vengê xo berz bikerî.  


 NAVENDÊ XEBERAN



Weşîya ci bena xirab

Nûmayişa greva vesanî yê bêwaxt û bêaçarnayen yê Strasbûrg zî kewt roja 19. La weşîya nûmayişkaran her ke şina bena xirab.  Nûmayişkaran vizêr bi komîteyê CPT pêdiyayin viraştî û aşkere kerdî ke CPT înan rê vato ke dê heta aşma Cotmeng û Kanûne rapor aşkere bikerê. Ser na tewrî nûmayişkaran aşkere kerdî ke şik û tersê înan hona vêşî bî berz.

Hunermendê kurd zî şî zîyaretê nûmayişkaran û paştîdayişê xo ardî ser zon. Hozan Sosin, Seyîdxan, hozan Şemdîn, Peyvan Arjîn û Cewat Merwanî ra pîya qafîleyekê hunermendî  bi konserekê, bi klam û muzîkê xo destegê xo aşkere kerdî. Hunermendan zî waştî ke desinde bi Ocalanî ra pêdiyayiş virazîyo û statuyê Şengal bîro silasnayen. 

Na hefte azayanê Hereketê Ceniyanê Kurdî yê Awrupa nûmayis dewr girot. TJK-E da zonayene ke tivarî, weşiya Ocalan ra guman beno.  


 ANF/STRASBÛRG