Verra Rayverê Şarê Kurd Abdullah Ocalan’î 15ê Sibat 1999î ra na het tecrîdê do giran yeno ramiten. Vervatoxa KJA Ayla Akat Ata aşkere kerd ke, şexs dê Rayverê Şarê Kurd Abdullah Ocalan’î de, şaro ke bawerîya xo sîstemê paradîgmaya neteweya demokratîk ardo yeno tecrîd kerdin.
Aşma Tîrmeh’a 2011’î ra na het pêdiyayişê pawitoxan bi Ocalan’î yenê manîkerdiş. Tewr peynî de zî Heyetê Îmrali zî, 5ê Nîsan 2015’î ra heta nika nêşkeno bi Rayverê Şarê Kurd Abdullah Ocalan’î reyde pêdiyayişî virazo. Dustê na bêhiqûqiye nêrazîbiyenê şarê Kurdî her ke şino jêde-vêşî benê. Vervatoxa Kongreya Cenîyê Azad KJA Ayla Akat Ata derheqê babedî de qisey kerd.
Çiyê do hiqûqî niyo
Ata dîyar kerd ke roja girewtişê Rayberê Şarê Kurd Abdullah Ocalan’î ra na het, no 17 serriyo ke Îmrali de tecrîdeko giran yeno romiten.
Ayla Akat Ata hayr ant qanûnanê Tirkiye ser û wina vat: “Qanûnê welatî de heqê şert û mercê tepişteyan estê. Labelê sîstemo ke Îmrali de yeno ramiten de ti qanûnî çinî yê. Ma wazenê no pergalî-sîstemî parçe bikerê û werte ra wedarnê. Ma wazenî ke Rayberê Şarê Kurdî Abdullah Ocalan ke hetê kesê demokratan ra sey sermuzakerevan yeno nîşandayîş, azad bibo.
Vervatoxa Kongreya Cenîyê Azad Ayla Akat Ata vist vîrî ke, ê zey KJA wazenê bi nûmayişanê xo bala raya pêroyî biancî tcrîdî ser û wina qisey kerd: “Semedê wedarnayişê şert û mercê ke Birêz Ocalan têde yo, ma serra 1999’î de serpirodayişê (muraceat)Mehkema Heqê Merdiman ê Awrûpa (MHMA) kerdbi û ewro nê dawayî dewam kenî. Her çend ke dawayê Birêz Ocalan’î hema dewam kenî zî pêdiyayişê ci yê bi pawitoxan yeno qedexekerdiş. Buroyê Hiqûqî yê Seserreye semedê pêdiyayişî serpirodayişê kenê, la heta nika ti netîce nêameyo girewtiş.”
Qirkerdişêkî gird bi
Ata vist vîrî ke şirawitişê 5 tepişteyanê bînî zî tecrîd nêşikna û wina va: “Wexto ke eleqeyê Ocalan’î dinya ra ame qerfnayiş, verra şoreşê ceniyan qirkerdişê girdî amey kerdiş.
Ata ard ziwan ke, didi hetê tecrîdo ke ser Birêz Ocalan’î yeno ramitiş estê û wina va: “Ma nêşkenî şirawitişê 5 tepişteyan ra Îmrali zey wedarnayişê tecrîdî bivînê. Tecrîd serra 99’î ra heta nika dewam keno û ma cenî no tecrîdî şexsê Birêz Ocalan’î de dustê xo vînenê. Cenî dormeyê slogana ‘Cenî azad nêbo komel zî azad nêbeno’ de are bîye û cayê xo mîyanê têkoşînî de gênî.
Ata hayr ant hêrişanê qûwetanê dewlet yê verra ceniyan ser û qiseyê xo wina ramitî: “Nika Kurdistan de ravêrşiyînê bi rayvertiya cenîyan de benê û zihnîyetê serdest zî serva ke na raştî binimnê, hêrişî ceniyan keno. Wexto ke merdim 6 aşmê peynî ra weyniyeno, vîneno ke dustê cenîyan de qirkerdişê girdî yenî kerdiş. Wazenî bi no şiklî vernîya şorişê cenîyan bigîrê.”
Tecrîd dustê şarî yo
Akat Ata qalîkerdişê xo de vist vîrî ke “tecrîd eslê xo de ser şarê ke bawerîya xo paradîgmaya neteweya demokratîke ardî û verê xo dayo hedefê seyyewbînanî û yewitî ra yeno ramitiş. Tenya dustê cenîyan nê, dustê heme şarê ke dormeyê paradîgmaya cuya azad de kom biyî ra yeno ramitiş. Ata ard ziwan ke, tepişteyê ke hetê Birêz Ocalan’î ra sewqî girotxaneyanê bînî bî ser de zî tecrîd yeno ramitiş û va: “Her çend ke îxtidarî bedilyayê zî, la tecrîd nêbedilyayo.”
ANF/AMED