ALÎ KOÇER ANF / AMED Tecrîdo girankerde ke Rayberê Şarê Kurdî Abdullah Ocalanî ser o yeno domnayene, dewam keno. Ocalan 11ê Êlula 2016î de tena pêvînayîşêko kilm viraştbî û o wext ra nata ti xebere tira nîna girewtene. Heme muracatê pêvînayîşî bi mehneyanê ‘Keştîye xirabe ya, rewşa hewayî baş nîya û OHAL’ yenî red kerdene. Tewr peynî Partîya Demokratîke ya Şaran (HDP) hewteyo bîn waşt Ocalanî reyde pêvînayîş bikero, labelê heta nika ti cewab nêameyo dayene. Babete ser o Parlamentera HDPyî ya Amedî Dersîm Dage qisey kerde. Dage dîyar kerde ke kurdî Ocalan sey rayberî qebul kenî û wina domnaye: “Esîrgirîyayîşê Ocalanî yeno manaya esîrgirîyayîşê şarêkî. Tecrîdo ke Rayberê Kurdî ser o yeno domnayene, kurdan ser o yeno domnayene. Yê ke nê tecrîdî bişiknî, ciwanê kurdan î. Xora faşîzm esîrgirewtişê rayberê şarêkî yo.” Dage dewamê qiseykerdişê xo de wina va: “Bi esîrgirîyayîşê rayberê şarêkî hewl dîyeno o şar zî çinî bêro hesibnayene. Ma partîya ke kurdî rayanê xo danî ya. Ma seba ke Birêz Ocalanî reyde pêvînayîş bikerî, muracat kerd. Heta nika ti cewab nêdîyayo ma. Labelê se beno wa bibo, ma do nika ra pey zî muracatanê xo bidomnî. Xora tecrîdo ke Ocalanî ser o yeno domnayene, nîşan dano ke kurdî bin zextêko senîn de yî. Ganî vera faşîzmî de bi hawayo topyekun xoverdayîş bêro nîşan dayene. Partîya ma projeyanê Ocalanî reyde pê ameya. Ma do çarçewaya polîtîka û pîvananê partîya xo, tecrîd û zextan bişiknî.”