Vera tecrîdo ke Rayberê Şarê Kurdî Abdullah Ocalanî ser o yeno domnayene de reaksîyonê şaran her ke şono zêde beno. Na çarçewa de pawitoxanê heqê merdiman yê almanan çalakîya nobete ya Ocalan rê Azadîya zîyaret kerdî. Herêma Stavra ya Rûsya de zî tecrîd ame prostesto kerdene û seba yewîye veng ame dayene.
2 serrî ra zêde yo ke Rayberê Şarê Kurdî Abdullah Ocalan ra ti xebere nîna girewtene û no het de her ke şono etirîyayîşê şarî zêde beno. Muracatê avûkat û keyeyê Ocalanî bi mehneyanê cîya-cîyayan yenî red kerdene.
Vera tecrîdî de çalakîyê tewir tewirî yenî viraştene û nînan ra yewe zî bajarê Strasbourgî de yena viraştene. Bajarê Strasbourgî yê Fransa de vernîya Konseyê Ewropa de, çalakîya ke seba azadîya Rayberê Şarê Kurdî Abdullah Ocalanî yena viraştene, ci rê zaf eleqe esto.
Vizêr pawitoxanê heqê merdiman yê almanan ra grûbêka ke Konseyê Ewropa û Mehkemaya Heqê Merdiman ya Ewropa (AÎHM) zîyert kerde, çalakîya nobede zî zîyaret kerde. Temsîlkarê Konsey û Parlamentoyê Ewropa yê HDPyî Fayîk Yagizayî zîyaretkaran reyde eleqeder bi û derheqê tecrîd û polîtîkaya hêrîşkare ya AKPyî de zanayîş da. Komîteya amedakarîya çalakîye ra Zulfu Bîngolî zî derheqê çalakî û dişmenîya Erdoganî ya vera peroyê kurdan de qisey kerd û qewimîyayîşanê peyênan yê Kurdîstanî ser o zanayîş da.
Çalakîya Nobete ya Azadîya Ocalanî ke Strasbourgî de yena domnayene, çalakîya tewr derge ya ke kurdistanijî Ewropa de virazenê. Çalakîye 25ê hezîrana 2012î de dest pêkerdbî. Heta ewro welatanê cîya-cîyayan yê dinya ra bi sehezaran kesan rê bi vilaweke û broşuran derheqê felsefeya Ocalanî û tecrîdî de zanayîş ameyo dayane.
Stavra de çalakîya protestoyî
Kurdê ke herêma Stavrapolî ya Rûsya de cuyenî, tecrîdo girankerde ke Rayberê Şarê Kurdî Abdullah Ocalanî ser o esto, şermizar kerdî. Kombîyayîş Komeleya Kulturê Kurdan de virazîya, tecrîd ame prostesto kerdene. Ser nameyê kurdê ke herême de cuyenî, Hemsereka Otonomîya Kurdan ya Stavrapolî Nazê Bazuyeva û Endamê Meclîsî Mustafa Sultanî bale antî tecrîdî ser. Îzehet de bêvengîya dezgeyanê mîyanneteweyîyan zî ame şermizar kerdene. Îzehet de ca dîya hêrişê dewleta tirkî yê vera Başûrê Kurdîstanî û seba yewîye veng dîya.
MERKEZÊ XEBERAN
Seba ameyoxe ganî wedarîyo
2 serrî ra zêde yo ke Rayberê Şarê Kurdî Abdullah Ocalan ra ti xebere nîna girewtene û no het de her ke şono etirîyayîşê şarî zêde beno. Muracatê avûkat û keyeyê Ocalanî bi mehneyanê cîya-cîyayan yenî red kerdene.
Babete ser o Hemsereka HDPyî ya Bajarê Stenbolî Esengul Demîre qisey kerde û hişyarîyê muhîmî kerdî. Demîre dîyar kerde ke şer de tewr zaf kurdî tesîr benî û wina domnaye. “Nizdîyê 3 serrî yo ke têkilîya Ocalanî teberî reyde çin a. Şar wazeno ke wa dewlete reyna Ocalanî reyde pêvînayîşan bikero. Seba wedarnîyayîşê tecrîdî, heme ca de kampanyayî yenî viraştene. Krîzo ke welat tede yo, ancax bi no hawa qedîyeno.”
Demîre dewamê qiseykerdişê xo de wina va: “Seba ke aştîye bêro welat, ganî pêvînayîşî dest pêbikerî. Polîtîkayê AKPyî rojeva aştîye reyde eleqeder nîyî. AKP hewl dano krîzî kûrêr bikero. Şerê Rojhelatê Mîyanênî de zî Tirkîya hewl dana polîtîkayanê şerî bidomna. Netîceyê tecrîd û polîtîkayanê şerî de kaos yeno cuyayene. Eke fek nînan ra verabidî, eşkenî problemanê ekonomîkan çareser bikerî. Îqtîdar şexsê Ocalanî de kurdan ceza keno û hewl dano teslîm bigîro. Seba rojanê roşnîyan ganî prosesê muzakereyan dest pêbikero. Ma sey HDPyî vanî ganî prosesê aştîye dest pêbikero.”