Huqûqnasê rojawanijî derheqê tecrîdo ke Rayberê Şarê Kurdî Abdullah Ocalanî ser o yeno domnayene de qisey kerdî. Huqûqnasan da zaneyene ke seba ke Ocalanî ra tersenî, tecrîdî domnenî û wina domnayo: “Hêzê îqtîdarî ke fikranê Ocalanî ra tersenî, bi tecrîdî hewl danî ey bêtesîr bikerî.”
Dewleta tirkî 27ê temmuza 2011î ra nata Rayberê Şarê Kurdî Abdullah Ocalanî ser o tecrîdêko giran domnena. Badê ke 11ê êlula 2016î de Mehmet Ocalanî birayê xo reyde pêvînayîşêko kilm viraşt, ti xebere Ocalan ra nîna girewtene. Çend rojî verê ame vatene ke 6 aşmî cezaya dîsîplînî dîyaya Ocalanî.
Her ke şono vera tecrîdî de reaksîyonî zêde benî. Huqûqnasanê rojawanijan zî vera tecrîdî de reaksîyon nîşan da û dîyar kerd ke çîyê ke yenî kerdene ‘gîrîyayîşê binê lingan yê qanûnê mîyanneteweyî yo’. Huqûqnasan ra Mahmut Cemîlî da zanayene ke dewleta tirkî bi no hawa huqûqê mîyanneteweyî gêna binê lingan.
Cemîlî va ‘Ocalan rayberê şarêkî yo û heqê ci esto ke şarê xo reyde têkilîye rono’ û wina dewam kerd: “Tena ronayîşê têkilîye nê, heqê ci esto ke xebatanê xo yê sîyasîyan mîyanê şarê xo de bidomno. Çi heyf ke rewşe wina nîya. Ma zî veng danî dezgehanê huqûqî yê mîyanneteweyîyan ke wa wayîrê berpirsîyarîya xo bivejyî.”
‘Çi ma dest ra bêro, ma do bikerî’
Cemîlî bale ant armancê dewleta tirkî ser û wina va: “Dewleta tirkî wazena îradeya kurdan bişikna û teslîm bigîra. Vana qey eşkena tecrîdî reyde îradeya Ocalanî, kurdan û şerwananê azadîye teslîm bigîra. Labelê bi desan reyan îsbat bîyo ke no mumkin nîyo. Seba wedarnîyayîşê tecrîdî çi destê ma ra bêro, ma do bikerî.”
Fikrê Ocalanî Rojawan de erzîyenî pratîk
Huqûqnase Qadî Terfa Mistoye zî va ‘seba ke Ocalanî vera sîstemê îqtîdarperestî de têkoşînê azadîye domnayo, raştê tecrîdî yeno’ û wina dewam kerde: “Şexsê Ocalanî de şarî yenî hedef girewtene. Tecrîd raştîya xo de vera felsefeya Ocalanî de beno. Labelê ewro Rojawan de fikir û felsefeya Ocalanî erzîyenî pratîk.”
Rolo gird yê cinîyan o
Terfa Mistoye va ‘Ocalanî averşîyayîşê têkoşînê azadîye yê cinîyan de rolêkê esasî kay kerdo’ û wina qedênaye: “Cok ra vera tecrîdî de berpirsîyarîya tewr girde kewena milê cinîyan ser. Çimkî ma bi felsefeya Ocalanî bîyî hêz û têkoşîn danî. Ocalanî cinîyan mîyanê bataxîye ra vet. Cok ra ewro şorişê Rojawanî sey şorişê cinîyan yeno şinase kerdene. Cok ra tîya de berpirsîyarîya tewr gird ya cinîyan a. Ganî cinîye keye de, ziqaq de, cayê karî de û sewbîna kura de beno wa bibo, ganî vera tecrîdî de bivindera û têkoşînê xo berz bikera. Ancax bi no qeyde tecrîd wedarîyeno.”
AHNA / HESEKÊ