Hemverfeka HDKyî Gulistan Koçyîgîte û avûkate Razîye Turgute derheqê tecîdî de qisey kerdî. Koçyîgîte şehîdanê 14ê Temmuze yê Rojeyê Mergî vîr arde û wina va: “Ma 2015 ra nata çi derheqê weşîye û çi zî ewleyîye de ti xebere Ocalanî ra nêgênî.” Turgute zî dîyar kerde ke heme kerdişê Îmrali vilayê heme zîndanan bîyî.” Rayberê Şarê Kurdî Abdullah Ocalan ke serra 1999î ra nata binê tecrîdî de yo û bitaybetî çend serranê peyênan de no tecrîd ameyo giran kerdene. 11ê Êlula 2016î ra nata ti xebere Ocalanî ra nîna girewtene û 2011 ra nata avûkatê ci, 2015 ra nata zî Heyetê Îmrali nêşêno ey reyde pêvînayîşan bikerî. Babete ser o Hemverfeka Kongreya Demokratîke ya Şaran (HDK) Gulistan Koçyîgîte û avûkate Razîye Turgute qisey kerdî û vera tecîdî de reaksîyon nîşan dayî. Koçyîgîte qiseykerdişê xo de sifteyîn şehîdê Rojeyê Mergî yê Girdî M.Hayrî Durmuş, Kemal Pîr, Alî Çîçek û Akîf Yilmazî vîr arde û wina dewam kerde: “Wextê derbeya leşkerî ya 1980î de xeylê neheqîyê girdî estbî. Ez Kemal Pîr û embazê bînî ke vera nê neheqîyan de xover dayî û rayîrê azadîye akerdî bi rêzgirewtişî vîr ana. Têkoşînê înan ewro sebebê estena ma yo.” Koçyîgîte qiseykerdişê xo de vera beratkerdişê lîderê mafya Sedat Pekerî de reaksîyon nîşan daye û wina dewam kerde: “Kesêko winasî hetê huqûqê nê welatî ra ame pak kerdene. Labelê hemverfekê HDKyî Onur Hamzaogluyo ke aştîye waşt, bi aşman o zîndan de yo. Reyna heqê pêvînayîşî yo bêsînor dîyayo lîderê mafya û edalet girîyayo binê lingan.” Sewbîna rayîr çin o Koçyîgîte dewamê qiseykerdişê xo de bale ante rewşa Ocalanî ser û wina va: “Hetê nêyî de ma bêhuqûqîyêka girde reyde têrî yî. Lîderê mafya rê heqê bêsînorî yê pêvînayîşî yeno dayene, labelê heto bîn de ser Rayberê Şarê Kurdî Abdullah Ocalanî de tecrîdêko giran esto. Heta nika bêxera yew pêvînayîşê keyeyê Ocalanî, 5ê Nîsana 2015î ra nata Ocalanî ra ti xebere nîna girewtene. Ma çi derheqê weşîye û çi zî ewleyîya ci de nêşênî melumatan bigîrî. Nê her di rewşî daxî nîşan danî ke dewlete sernî yena îdare kerdene. Cok ra ganî vera faşîzmî de ma pêro pîya têkoşîn bidî. Xora sewbîna rayîr çin o.” Kerdişê Îmrali vilayê heme Tirkîya bîyî Avûkate Razîye Turgute zî qiseykerdişê xo de qala kerdişanê OHALî kerd û dîyar kerde ke nê kerdişî tecrîdo ke Rayberê Şarê Kurdî Abdullah Ocalanî ser o yeno domnayene ra girêdaye yo. Razîye Turgute dewamê qiseykerdişê xo de wina va: “Na tabloyêka prosesê OHALî de vejîyaya orte, seba ke tecrîdo ke Ocalanî ser o esto, vilayê pêroyîya Kurdistan û Tirkîya bîyo de awan bîya. Wexto ke Birêz Ocalan ame tepiştene, goreyê ci rejîmêkê înfazî ame dîyar kerdene. No rejîmê înfazî mîyanê demêko kilm de nê, labelê demêko derg de heme kerdişê Îmrali vilayê heme zîndananê bînan bîyî. Sey nimune serra 2001î de zîndanan de sîstemê Fyî dest pêkerd û no bi xo zî tecrîd bi. OHALî ra dima sey Ocalanî pêvînayîşê ma yê bi muwekîlanê xo ame qedexe kerdene.” MERKEZÊ XEBERAN