Hepsîya cinîye Mesude Pehlîvane ke gazê kîmyewî yê ke serra 2000 de operasyonê ‘Agêrayîşê Ciwîyayîşî’ de ameybî eştiş ver nêweşîya rîşa merdimwere laşê aye de vejîyayebî, nika Hepisxaneyê Sîlîvrî yê Hûmara 9. de manena û tedawîya aye yeno astengkerdiş.Cinîya bi nameyê Yildiz Keskîne ke hetê Pehlîvane de mendêne û tehlîye bîye, rewşa Pehlîvane ser o qisey kerde.
Nîme de mende
Keskîne va ‘tedawîya Pehlîvane hetê Mudurîya Hepisxaneyî ra yeno astengkerdiş’ û wina domnaye: “Mesude de nêweşîya rîşa merdimwere esta û roja ke ameya Sîlîvrî ra nata, tedawîya aye nîme de menda. Eke tedawîya aye nêro kerdiş, beno ke Pehlîvane bimira. Pehlîvane ‘tedawîya kurî’ dîyêne û ganî tedawîya Pehlîvane rê bi hawayo rojane bêro dewamkerdiş. Wezîrê Edaletî Bekîr Bozdagî vatbî ‘Hepisxaneyanê Tirkîya de îşkence û muameleyo xirab çin o, yê ke vanî esto; ganî îspat bikerî’, hepisxaneyê Sîlîvrî de îşkence bi mi ame kerdiş û nika zî bi Mesûde yeno kerdiş.”
Endamê Komeleya Piştîdayîşêyewbînan yê Keyeyanê Hepsîyan (TAYAD) Fahrettîn Keskînî zî wina va: “Qetlîyamê 19ê kanûne ewro zî dewam keno. Her çiqas ke verê cû ma Wezaretê Edaletî ra destûr girewtbî zî polîsan asteng kerd. Ganî na neheqîye derhal peynî bibo û Pehlîvane serbest bêro veradayîş.”Heto bîn ra seba ke Pehlîvane serbest bêro veradayîş keyepelê Change.orgî ra kampanyaya îmzeyan dest pêkerdo.
DÎHABER / STENBOL