Yew aşme ra verê cû xeylek qenalanê televîzyonê kurdî hetê RTUK a Tirkîya ame qefelnayên. Goreya RTUK qenalan ‘propagandayê rêxistine kerdêne’ û yew îspatê înan deste çinîyebî. Qefelnayîşê nê qenalan mojnena ra ke dewlete Tirk ziwanê Kurdî ra hama ra zî tehamûl nêkeno û qayilo ke venge Kurdan bibirno. Nê polîtîkayan heta se serra ke dewam keno û wîna aseno ke do dewam zî bikero. Şima zî zanane ke mîyanê nê qenalan ra di qenal bi taybetî lehçeya ziwanê kurdî ra Kirmanckî/Zazakî zî weşaneyê xo wiraştêne. Şare kurd nê qenalan bi kêf û weşî temaşe kerdêne.
Qenalê Zarok TV semedê qican/domananê Kurdan bî. No qenal de hem bi lehçeya Kurmancî hem zî bi lehçeya Kirmanckî xêzefilm est bî. Opsîyonê ziwanê de her di lehçeyan de temaşe bibîyêne. Nizdîyê yew serra nîm zî ke weşanê xo kerdene. Yew ziwan de çiko tewr muhîm musnayişê, zanayişê, qalkerdişê û perwerdeyî qican o. Çi heyf ke nê hetan de bextê Kirmanckî çinîyo. Mîyane şarê Kurdî de lehçeyo ke tewr tay yeno qisêkerdiş Kirmanckî yo. Heta goreyê daneyên Unesco yî yê ziwanî ke xeter tay hîs kenê “bawerîye de nêyî.“ No semed ra zî Zarok TV semedê Kirmanckî yew bexto ke gird bi. Qican telewîzyona Zarok TV de hem ziwane dayîke xo musîyay bî hem zî bi keyf û weşî huyayene bî. Tersê dewlete Tirk zî no yo. Çunke zanane ke zîwan pey qican vîn nêbeno.
Jîyan tv zî sey Zarok TV par 21 Adare de destpe weşaneyê Kirmanckî kerd. No televîzyon wexto kilme de mîyane şare Kurd de zaf ame temaşe kerdiş. Jîyan TV zî zafanê babetan tarix, edebîyat, şîîr, kultur, ciwîyayîşê cînîyan û kurdan ser o program viraştene. Programê ke taybetî ye Jîyan TV bajare ke zazayan tede zaf cîwîyene oca ra viraştene û nê bajaran de goreya fekê şarî û mîyane şarî ra program viraştî. Xeylek merdim zî yan welate durî de yan zî hesret mendi bi erde xo saya Jiyan TV eskene ardê xo, merdimanê xo û dewane xo temaşe bikere. No sebeb ra Jiyan TV xeylek ca de ameyene temaşe kerdiş.
Dewlete Tirk serra neway ra nat bi taybetî Kirmanckî ser vindeno. Bi xususîyetî qayilo ke Kirmanckî ziwanê Kurdî re ciya bikero. Armance înan Kirmanckî xoser yew ziwan bihesebno û yew bîyene Kurdan bixeripno. Labelê televîzyonanê Zarok TV û Jîyan TV polîtîkaye înan bi weşaneyê xo pûç kerde. Zafanê qefelnayişe her di qenalan zi no semed ra yo.
Ma dewrê elm û resnayiş teknolojîyê de yî. No dewr de semedo ke pawitîş û xurtkerdişê ziwanê dayike gereka televîzyonê kurdî bibê. Nê televîzyonî hem vere asîmîlasyonê dewlete hem zi vere vindbîyayişê Kirmanckî ser de zaf muhim o.
Xo vîr ra mekerî, nişanê nasnameyê şarî, ziwanê êyî yo.