Mitîngê HDP yê ‘Derbe rê nê demokrasî nika’ roja verî Dersim de destpa kerd. Hemseroka HDP Fîgen Yuksekdag ke mitîngî de qisey kerd vist vîrî ke tecrîdo verra Ocalanî û ci ra xeber nêgirotiş seweta pêrokîn Tirkîye tehdîdetê newî yê derbe yo.
HDP mitîngê xo yê sifteyin ê vera derbe û rewşê awarte OHALî Dersim de viraşt. Mitîngo ke Meydanê Seyît Riza de virazîya parlementerê HDP Alîcan Onlu, Erdal Ataş, Besîme Konca, hemşaredarê sûk û qezayan ra pîya bi desan kes tewr bî. Mitîngo ke badê vindernayişê hurmet destci kerd de Hemseroka HDP Fîgen Yuksekdag bi selamkerdisê şêligî destci qiseyan kerd.
Yuksekdag vist vîrî ke tarîx ra na het înan dûştê hesaret û derbeyan, seweta azadî û têdûştî xoverda wo û ewro reyna xover danê. Hemseroka HDP aşkere kerd ke yê ke ewro îdia kenê ke dûştê derbe yê jû îmtihana girdî ra vêrenê ra û va ma tarîx ra na het na îmtihan day.
Îxtidara AKP leyê demokrasî de nîya
Yuksekdag vist vîrî ke her derbeyekê dûştê înan, şaran virazîya û nîya va: “Dûştê derbeyanê lejkerî, OHAL, rewşê awarte ma her tim leyê serbestî bî. Cayê ma her tim dûştê derbe û zerreyê xoverdayişê azadî bi. Ewro cayê yê ke vanê ma dûştê derbe yê nêvûrnîyeno.”
Hemseroka HDP Fîgen Yuksekdag aşkere kerd ke îxtidara AKP û Seray ke vana ma dûştê derbe yê demokrasî het de nîyê û nîya dewam kerd: “Înan derbe sifteyîn 15ê Tîrmeh de dî. La ma bi serrano vînenê. Çîyo ke îxtidara AKP/Seray jû serrîyo kena derbe yo. Jû serrîyo sûkanê ke bin ablûqa de yê de derbe, OHAL ciwîyeno. Tanqê ke sûkanê kurdan, bindestan girotê bin ablûqa, F-16ê ke bombevaran kerdî ewro kinarê meclîsî ra perrenê. Ravêrdî rojawayê Tirkîye zî. Eke şima demokrasî serva jew leteyê welatî nêpawenê se, kurdan rê zilim û îşkence rewa vhinenêse şima nêşkenê cayanê ewle zî ronê. Şima jû serr welatî bi herb, zorvajî, bi zilm îdare kerd. Netîceyê zilim, zorvajî û mîlîtarîzmî rê ray rakerdiş de şarê Tirkîye bi derbe û tehdîdê herbî ra rîbirî amey. Na rîwal ra vanime bi lezîn demokrasî.”
Demokrasî bi destê şaran yena
Fîgen Yuksekdag vist vîrî ke yê ke derbeya lejkerî peyser pisiknay serva tîvarîya xo herb ramenê. Yuksekdag aşkere kerd ke eke alewî, kurdî, cenî ewleyî de nîyê se kes ewleyî de nîyo û nîya va: “Eke ser na hardî de her roj merdiş, şîdet, zilim bîyo leteyê weşî se kes jew ca de aramî nêvîneno.”
Yuksekdag hayr ant pêdiyayişanê partîyanê rejîm yê Seray ser û va: “Seray de kam cîno, HDP çîno. Xo ra meraqê ma yê şîyayişê Seray çinîbi. La bê HDP şima nêşkenê pêkerê, şima o resîmê sexte bin de manenê. Dûştê sextekarîya şima derbe raşt a.” Yuksekdag ke xîtabê îxtidar kerd va ‘şima zûrîyê şima benê’ û hayr ant tekoşînê demokrasî ser: “14 serrîyo bi zûrî, bi zorvajî amey sînorê tewr peynî. Endî zerya qedîya. Bi derbeya lejkerî û yê seray demokrasî nîna ser no hardî, do bi tekoşîna demokratîk yê şaran bîro. Nayî ra vanime desinde demokrasî û dûştê derbeyan azadîya xo seveknenime.”
Redkerdenê muzakere raya dînamîkanê derbe akerd
Yuksekdag hayr ant tecrîdê verra Rayverê Şarê Kurd Abdullah Ocalanî ser û aşkere kerd ke girotişê raya çarekerdiş û muzakereyan vernîya mekanîk û dînamîkê derbe rakeno. Yuksekdag da zonayen ke wextê dîyalog û pêdiyayişan de Birêz Ocalanî bi desan reynî îqaz kerd û nîya va: “Bi desan serrîyo welatî bi her û zorvajî îda kerdî. Rixmê îqazanê ma Tirkîye de çêberê bengeya derbe rakerdî. Na derbe Sûr, Cizîr, Nisêbîn, Gever û Licê de tenzîm kerdî. Zerreyê merdiş, bermayiş û dejanê kurdan mîyan de derbe rêxistin kerdî. Eke şima goş dabîyabi ma şima do rewna ra xebera derbe girotiya bi.”
Yuksekdag aşkere kerd ke beno ke kinarê derbe ra açarnîyayî û va la rejîmê OHALî de şîdet û îxtimalê derbe rameno. Yuksekdag vist vîrî ke derbeyan ra xelesnayiş bi hadrekerdişê bingeyê demokrasî beno û nîya va: “Nîyadê ewro dûştê derbe roşan îlan kerdî. Tayî roşan kenê la tayî kî şîn gênê, hewar kenê, bermenê, cenazeyanê xo geyrenê, keyeyo ke vîran bîro înşa kenê. O wext no roşan zûrî yo.
Raya derbeyan hetê Ocalanî yena giroten
Hemseroka HDP Yuksekdag îlankerdişê rewşê awarte rê zî hêrsê xo damûsna û nîya va: “AKP bi îlankerdinê rewşê awarte OHAL"a wazena, quwetê xo vêşî bikiro. La belê çiyê rast ê vera darbeyan OHAL niyo, panzehîrê darbeyan demokrasî yo. OHAL çareserîn nêano, tersê ci, welatî vera felaketî beno. Coka ma hem vera darbe û hem vera OHAL"î vejiyenê.” Yuksekdag qandê peyniyê OHAL"î biyaro û raya aştî û çareserîn akiro jî veng da dewleta tirk û nîya vat: “Lazimo rojê ravey, peyniyê tecrîdê mîmarê aştî birêz Ocalan'î biyaro. Demê çareserîn newe ra dest bikiro ci. Eki nîya nêbo û raya birêz Ocalan'î nêabiyo, raya darbeyan nîna giroten.” Yuksekdag Qetlîama Qamişlo kî lanet kerd, malbatê kesê ke weşîya xo kerdî vinî rê zî serweşî waşt.
DÎHA/DERSIM