Serekê Baroya Amedî yo verên Tahîr Elçî 28ê teşrîna peyêne ya 2015 de qezaya Amedî Sûr de amebî qetilkerdiş û her çiqas ke qetilbîyayîşê ci ser ra yew serre vîyarto zî, hema zî derheqê dawa de gamêk nêameya eştiş. Babete ser o Endamê Tehqîqatê Cînayetê Tahîr Elçîyî û avûkatê keyeyî Mahsunî Karamanî qisey kerd. Karamanî vist vîrî ke ‘her çiqas ke yew serre vîyarto zî heta nika înan rê çîyêk nêameyo vatiş’ û va: “Goreyê ma mergê Elçîyî cînayet o û seba ci zî xeylê zafî delîlî destê ma de estî.
Ma dê pers bikerî
Karamanî do zonayen ke ‘6 aşmanê peyênan de ti têkilîya înan dosyaya Elçîyî reyde nêmenda’ û wina dewam kerd: “Her çiqas ke dosya de qerarê nimiteyî çin o zî, ma rê çîk nîno vatiş. Heta nika dosya de tena yew keso ke şikdar çin o, sîleho ke pê Tahîr Elçî ameyo qetilkerdiş, tespît nêbîyo; çimkî dendika guleyî nêameya dîyayîş. Heta nika dosya de 3 dozgerî ameyî bedilnayîş, la ti averşîyayîş çin o.”
DÎHABER / AMED