28ê hezîrana 2013 de wexto ke qezaya Licê ya Amedî de şar viraştişê qereqolan protesto kerdêne, leşkeran gule şarî ser de varnaybî û netîceyê ci de Medenî Yildirimo 19 serreyî ameybî kiştiş. Leşkero ke nê kiştişî ra ameyêne mehkemekerdiş, beraat kerd. Medenîyo ke vera şerî de merd, ‘şehîdê xoverdayîşê Gezî’ ra hesibîya. Dayîke Fahrîye Gunduz Yildirima ke her roje tîşortê Medenî boye kena, qisey kerde.
Dayîke Yildirime va ‘badê ke lajê ma ame kiştiş, seba formalîte doze ameye akerdiş, her çiqas ke mîyanê roje ame kiştiş, reyna zî ceza nêdîya ti kesî’ û wina dewam kerde: “Roja ke qerar dîya, mi waşt ez tîşorto gonîn yê Medenîyî bîşêra, bierza rîyê înan. Belkî wijdanê înan qebul nêkero. Ma 4 serrî yo ke dej ancenî.”
Ma zaf zehmetîyî antî
Dayîke va ‘fermandaro ke emrê kiştişê Medenîyî da, qerarê kiştişê Mehmet Şîrîn Kocakayayî zî da’ û wina domnaye: “Mehkeme her di dozan de qerarê bêtaqîbî daye û înan xelate kerde. Labelê ez do heta qirika înan nêverda. Ganî leşker, fermandar û tîmê JOHî zî do hesab bidî. Ma bê Medenî zaf rojanê zehmetan derbaz kerd. Wextê xoverdayîşê Gezî de Medenîyî mi ra va ‘Dayê ma 35 serrî yo her roje zulm vînenî. Rojawan reya sifteyîne vîneno, do nika halê ma fam bikerî’. Medenî seba Roboskê, Ceylan Onkole, Gezî, Berkîn Elvan tim rasteyan de bî. Neheqî qebul nêkerdêne. Mi mehkeme de va; dewlete kutikê xo daxî pawena, la merdimî û edalet nêzana. Nika dejê ma û keyeyê ke lajê xo Xoverdayîşê Gezî de merdî bîyî ortax. Ma nê zulmî qebul nêkenî.” n DÎHABER/AMED