Heyetê HDPyî ke Hemserekê Pêroyî yê HDPyî Sezaî Temellî, Hemserekê KCDyî û parlamenter Berdan Ozturk, Wekîla Hemserekîya HDPyî û parlamentere Fatma Kurtulane, Hetkarê Hemserekîya HDPyî Nazmî Gur, verfekê Komîsyonê Têkilîyanê Teberî û parlamentere Feleknas Ûca û parlamenter Îmam Taşçierî ra pê ameyêne, şi Başûrê Kurdîstanî.
Heyetî ewil Serekê Pêroyî yê PDKyî Mesûd Barzanîyî reyde pêvînayîş kerd û dima ra Partîya Kedkaranê Kurdîstanî de ame têhet. Heyetê Partîya Kedkaranê Kurdîstanî de Saed Xelîd, Hîwa Seyîd Selîm û selahîyetdarê bînî estbîy. Pêvînayîş ra dima îzehetêk dîya çapemenîye.
Ma ancax bi piştîdayîşî eşkenî vera nînan de vinderî
Ser nameyê Partîya Kedkaranê Kurdîstanî Saed Xalidî va ‘no zîyaret prosesêko muhîm de virazîyeno’ û wina domna: “Amancê nê zîyaretî o yo ke têkilîya mîyanê Kurdan xurt bikero û problemanê mîyanê Kurdan çareser bikero.”
Dima ra Temellîyî qiseykerdişê xo de da zanayene ke herême de problemo tewr gird problemê Kurdan o û wina dewam kerd: “Heta ke problemê Kurdan çareser nêbo, problemê demokrasî û aştîye zî çareser nêbenî. No problem tena Tirkîya reyde sînordar nîyo. No problemê Rojhelatê Mîyanênî yo. Hêzê ke vengê çareserîya Kurdan nêeşnawenî, vera Kurdan de şer danî ferzkerdene. Ma ancax bi piştîdayîşî eşkenî vera nînan de vinderî. No het de çi bikewo ser milê ma, ma do bikerî. Ganî Kurdî bêrî têhet û babeta yewîya neteweyî de seba ke kongreya neteweyî kom bibo, çi hewce bikero, bikerî.”
Temellîyî derheqê pêvînayîşo ke Mesûd Barzanî reyde kerdî de zî va ‘ma nê pêvînayîşî de xeylê çîyan ser o vindetî û no pêvînayîş baş derbas bi’.
HEWLÊR